Ombelewa yomupilima oya yandja ekwafo loikulya kovakwashiwana vaAngola tave lishilile po800 ovo va taukila moshitukulwa shaMusati.

Mongaha, eengudu deenhauki oda ngudumana peenhele da yooloka mOmusati, notadi twikile okumbobolokela moshitukulwa omo, moikandjoholololo ya yooloka unene tuu oyo ya ama keengaba.

Meenghundafana a ninga naKundana omunashipundi wombelewa yopashitukulwa yaMusati Andreas Shintama okwa koleka kutya ombelewa yomuprima oya yandja oukutu woufila ve li 2000 neeshi deendoxa di li 42 000.

Shintama okwa ti oikulya ei oya tamekwa nale okutopolelwa eenhauki koikandjohololo ya yooloka oku kwa didilikwa oko ku na Ovaangola.

“Onda pandula ombelewa yomuprima eshi ya kufa etokola lomondjila opo i yandje oikulya kovakwashiwana vo poushiindalongo Angola,” Shintama ta ti eshi kwa li ta tambula ko oikulya eshi ya fika moshitukulwa shaMusati.

Ovaangola okwa didilikwa ve li momikunda da yooloka ngaashi Oshifo, Etunda, Olupito nosho tuu. Etunda olo limwe la didilikwa li na Ovaangola vahapu.

Shintama okwa ti Ovaangola ava ove li mefiloshisho la wana. Ova pewa yoo otenga yomeva kelelo lodoolopa yaRuacana opo va kale tava nu omeva a yela. Yee ta yelifa kutya omilandu doCovid-19 onghee tadi twikile nokulandulwa kOvaangola ava, onghee okwa ti otava pewa elongo lawana nghee vena oku li kelela kombuto yoCovid-19.

Okwa hokolola kutya omwaalu onghee tau enda wa uka pombada efiku nefiku moshitukulwa shaMusati unene tuu modoolopa yaRuacana.

“Ohandi kunghulile oshiwana opo shi kale shi na ombili nelongelokumwe nOvaangola ava,” Shintama ta ti.

Caption: Omunashipundi woMusati Regional Council Andreas Shintama ta yandje oikulya kOvaangola.