• September 20th, 2020
Login / Register

Omukuluntu gUuhaku mOshana a ekelahi omapopyo gaafele kombinga yoCovid-19



Victoria Kaapanda 

ONGWEDIVA-Oshitopolwa shaShana sigo onena kamuna natango omunuuvu  nenge omuntu tafekelwa ena omukithi gwoCovid-19. Dhoka odha pitithwa komukuluntu gUuhaku nOnkalonawa moshitopolwa shaShana Johanna Haimene.

Haimene okwa ekelehi omapyopyo ngoka geli moshigwana tati kutya  shoka tashi popiwa kutya moshipangelo shaShakati omwa monika gumwe ena omukithi ngoka no kwiika lekelwa kashina uushuli washa na aantu naya hulithe po oku popya iinima kayina omutse nandungu.

“Moshitopolwa shetu otuna mo aantu oyendji yiika lekelwa uule womasiku 14, konima sho ya galukile moshilongo okuza kiilongo yokondje shoka tashi vulu oku etelela omukithi ngoka,.  Aantu mboka oye li komagumbo gawo, ihe shoka itashi ti oya monika yena omukithi gwoCovid-19,” Haimene ta ti ngaaka, sho a popi naKundana ongula yo hela.

Omukuluntu gUundjolowele  okwa gwedha po ta ti oyendji mboka ya I kalekelwa pethimbo ndika  aaChina, mboka ya galukile moshilongo pethimbo omukithi ngoka gwaponekela nale moshilongo. 
Haimene okwa tsikile ko noku kumagidha aakwashigana ya I yuthe koompango nokomalombwelo agehe ga tulwa po okulwitha nokusinda oshowo okukelela omukithi gwoCovid-19.

Omukuluntu gwoshipangelo shaShakati Vizkaya Amutenya okwa kwashilipaleke kutya moshipangelo shaShakati ina mu monika mo ita mu fekelwa natango omuntu ena omukithi gwoCovid-19.
“Shoka tashi popiwa komalungula kutya omuna omuntu eli moshipangelo shaShakati ihe ota holekwa  kashishi sho shili nando,” Amutenya a popi ngaaka.

Ngoloneya gwoshitoplwa shaShana  Elia Irimari okwa ti sigo ongashingeyi  ita vulu oku gandja uuyelele nkene aakwashigwana taya ka kwathelwa ethimbo ndika lyoongeshefa dhawo dhapata oshowo mboka ya patelwa iilonga yawo.

Irimari okwa ti nonande opena shoka tashi ka ningwa po ita vulu natango okushi koleka pethimbo ndika, ashike kehe shoka tashi ningwapo otekeshi tseyithila oshigwana meendelelo.

“Oshitopolwa shaShana otashi ihumbata nawa, shalandula elombwelo lyomuPresidente gwoshilongo Hage Geingob kutya aantu naya kale momagumbo noondingosho na dhipate. Nonande pena mpeya naa mpeya mboka taya pukitha, ashike oshigwana otashi I humbata lela nawa,” Irimari a popi ngaaka.
Shika otashi ulike lela nkene oshigwana shasimaneka noshina uutile womukithi gwoCovid-19.

Monooli oositola oshowo oombaanga odhina omikweyo omileeleka pondje, mpoka aantu yiipitithila po omahala nokwiipa oompito okuya meni lyoositola. Omalombwelo oga landulwa noga simanekwa lela sigo oompaka.


New Era Reporter
2020-04-01 10:06:33 5 months ago

Be the first to post a comment...