• September 22nd, 2020
Login / Register

Omukulupe a nyematela naku mu tula komalungula


Lasarus Hakwaake

EENHANA – Meekulu Lucia Nghipandulwa wedula 66 womomukunda Ehoma moshikandjohoololo Omulonga moshitukulwa ohangwena okwa udifwa nai unene komafano  oo a kala ta tambulafanwa komapandja opamakwatafano  kutya oku li moluhepo lamadu namatutu, noke na apa ha teneke omutwe waye.

Okwa ti kutya omunhu ou emu faneka oku na omalalakano aye mwene a yooloka nokwa hala oku kakeka edina laye, lamwene womukunda wavo, lombelewa yoshikandjohoololo oshoyo loshitukulwa Ohangwena. 
Okwa ti nonande ta pumbwa omakwafo apa monghalafano ngaashi ovaNamibia aveshe, okwa li a pumbwa tete oku pulwa kutya omolwashike ta fanekelwa, nokwa li ena oku yandja epitikilo opo omafano aye a longifye komapandja opa makwatafano. Nghipandulwa okwa ti ovanhu ngeenge ova hala oku mu kwafa nave shi ninge ndele tete nava fimaneke ounhu womunhu ou ena. Okwa ti ina didilika kutya omafano aye otaa dulu oku longifwa opo ovanhu va wanifepo omahalo avo opapolitika, omafano ange aho na kale oshinima shopokati mopolitika yovanhu paumwene moshikandjohoololo, osho Nghipandulwa ati.

Nghipandulwa okwa popya edi eshi Ngoloneya wOhangwena, Omunashipundi woshitukulwa Ohangwena oshoyo mwene womunda Ehoma  va talelapo eumbo laye. Etalelepo lavo okwa li la xwaxwamekwa komafano oo kwa li ta tambulafanwa komapandja omakwatafano oshiwana oo ta ulike omukulupe eli moluhepo itai nuwa omeva. Eshi va fika peumbo, Nghipandulwa okwe va lombwela kutya efimbo keshe ngeenge a hangwa keshongo lopanghalafano oha shivifile mwenewokunda wavo ou alushe ha kwafa. 

Okwa twikila noku popya kutya omolwashike omunhu ena oku kufa omafano ndele te a longifa mwaasho a hala? Nghipandulwa ta pula. Nonande nee ngeno okwa li nda pumbwa omakwafo komuSamaria omunamutimanghenda, oinima hasho ha yeende osho, inandi shi panda osho nande nande. Okwa ti omakwafo avo na dilile alushe ku mwene womukunda wavo.

Ngoloneya Walde Ndevashiya oshoyo Kamushela Erickson Ndawanifa aveshe ova yandja omaano oipalwifa pamwe noidjalomwa. 
Erickson Ndawanifa okwa twa omukumo oshiwana shi kale alushe tashi popi oshili ngeenge tashi momakwatafano novanhu ovo veli momumbwe moshiwana. Okwa kunghhilila ovanhu opo va ha danauke neenghalamwenyo dovanhu nomatomeno opapolitika, kutya nee pamwe omunhu okwa pumbwa ekwafo shili ina ku pumbwa oku pitililifa onghalo oyo ilipo, paku kufa omafano noku a longifa, eshi eteyepo loshiwana. Okwa pula yo oshiwana opo shi fikife alushe eemumbwe doshiwana kombelewa yoshikandjohoololo ile ku mwene womukunda. Okwa indila ava va hala oku kwafa Nghipandulwa veshi ninge nomutima muwa ngaashi omuNamibia ta kwafa omuNamibia mukwao.


Staff Reporter
2020-05-22 09:56:00 4 months ago

Be the first to post a comment...