• August 7th, 2020
Login / Register

Ondalu ya geya monooli



ONGWEDIVA - Sho omwiidhi tagu kukuta nombepo ya ninga oyindji, omulilo monooli yoshilongo otagu tsikile okufika po iilya piipale nokuhanagula po omaulithilo giimuna momikunda odhindji monooli. 

Ehuliloshiwike lya zi ko, omulilo ogwa ponekele omukunda Omaambo moshikandjohogololo shaElim moshitopolwa shaMusati nokutula konyala omagumbo gaheyali moshiponga, gwa fike iilya piipale yimwe nokuhanagula po thiluthilu omwiidhi momakoye nomiishana. 
Shika osha ningwa owala konima yomasiku omashona sho omukunda Omuthitugwenkete natango moshitopolwa shaMusati nago gwa li gwa adhika koshiponga sha faathana nashikwawo. Ishewe, petameko lyomwedhi nguka, aanegumbo lyaFarres Ambata momukunda Iihongo moshitopolwa shaNayena mOndonga, oya li ya thigwa pomutenya sho iilya yawo ayihe ya pi po komulilo poshipale.
Gaali gaTala Iipinge, gwomomukunda Omaambo moonkundathana naKundana okwa ti, oya uva nayi noonkondo nonande kaye na shoka ye na okuninga po. 

“Okwa li tu na omwiidhi gwa mena nawa momnkolo getu, kakwa li tu na nando uupyakadhi wokulitha oshoka iimuna kakwa li hayi ka lithwa kokule, nena omwiidhi gwa pi po ishewe,” Iipinge ta ti ngaaka.

Iipinge ta popi ta ti omulilo ngoka ogwa li natango gwa fike po iilya yimwe ya li kooha dhomutunda gwoshipale. Ta ti okwa li a pandula Pamba oshoka iilya oyindji okwa li ya tutilwa nale meni lyoshipale, nomulilo inagu thika mo meni.
Momagumbo ngoka gaheyali ga kwatwa komulilo, Iipinge okwa ti egumbo lyawo olyo ashike lyi na iilya ya pya po.  Iipinge okwa hokolola kutya kakwa li ya kwathelwa okudhima omulilo kukadhima-mulilo, ihe okaakwashigwana mboka kwa li ya tondoka onkugo okuza pomikunda dhopuushiinda.

“Omulilo ngoka ogwa li gwa etwa kokanonamati komegumbo lyopuushinda wetu, sho kwa li ta ka fike aniwa okadhila ke li moshiyadhila, moka aniwa ka li ka hala okukafikila mo ihe omulilo ogwa taandele sigo okomankolo ga landula ko,”Iipinge a fatulula.
Ta gwedha po ta ti omulilo ohagu taandele mbala ethimbo ndika, oshoka ohaku kala ombepo oyindji, nomwiidhi ogundji go ogwa kwatathana.  Ta ti osha li sha kwata oowili dha thika puheyali okudhima omulilo ngoka nekwathelo lyaakwashigwana.

Okwa li a pandula ta ti, Kalunga na hambelelwe oshoka kape na egumbo lya pya po nenge omuntu a mona oshiponga.  Ta kumagidha ta ti aakuluntu naya longe aanona uupyakadhi oshowo oshiponga shokudhana nomulilo, ohashi vulu oku eta oshiponga oshinene.
Kansela gwoshikandjohogololo shaElim Gerhard Shiimi okwa ti, onkundana ndjoka okwa li ya thiki poombelewa dhawo, ihe inaya lopotelwa kutya ope na egumbo lyi na iilya ya pya po. “Pethimbo ndika itandi vulu oku shi koleka natango kutya ope na iilya ya pya po. Ashike oshi li kutya omalundu oga pya po lela. Aanambelewa yetu opo taya yi ya ka tale shoka sha ningwa po,” Shiimi a popi ngaaka.
 


Victoria Kaapanda
2020-05-19 10:10:39 2 months ago

Be the first to post a comment...

You might also like...