• November 17th, 2019
Login / Register

Outalelipo womifyuululwakalo otau kulike eliko –Geingob



■  Omutoolinghundana 

OSHAKATI - Omupresidente Hage Geingob okwa ti outalelipo wopamifyuululwakalo owa ninga outalelipo u na oshilonga notau yambula po eliko nomaxupilo oshilongo.
Moshopopiwa shaye sha leshwa kuMinista wElongo Katrina Hanse-Himarwa pefimbo lepatululo pambelewa loshivilo shomapata shOshakati Annual Totem Expo, Geingob okwa ti osha fimana neenghono okukaleka po omifyuululwakalo neenghulunghedi moshilongo shaashi itashi kwafa ashike meyambulepo leliko ashike otashi kwafa yo oshiwana opo shi lishiive shoovene okutala konakudiwa, shoo shi tungile ko noshi ete po efano lasho olo sha hala okukala sha shivika nalo kounyuni, ngeenge tashi ya komifyuululwakalo.
“Oshivilo eshi osha longekidwa opo shi ete oshiwana ashishe pamwe, shi hangene meengudu pamapata asho, aeshe ngaashi e shiivike moshilongo ashishe. Okoivilo yomaludi aa oko ovanhu hava shivafana nokutameka tava fimanekafana, molwaashi va shiva kutya ova pambafana pamapata ile pamwe ova dja momapata a yooloka.
“Ashike nande ongaho, ovanhu vetu ova kanifa shihapu, ve shi kufwa kovakolonyeki ovo va piyaaneka omaitavelo, eendjokonona nomifyuululwakalo detu. Eshi osha li sha ningwa opo tu kufwe eenghono, fye tu kale tuhe na apa twe likolelela onga oshiwana.
Omupresidende onghee okwa pula opo ovadali, ovatekuli neefikola opo ve litule mo okukala alushe tava twala ounona koivilo yomufyuululwakalo ngaashi shaTotem opo va shiive eenghuungedi nomifyuululwakwalo davo. 
 Oshivilo shOshakati Totem Expo 2019 neudo otashi tyapulwa koshi yoshipalanyole “okukoleka omakwatafano okupitila momifyuululwakalo”.
Oshivilo eshi otashi ulike nghene tashi twikile okunana ovanhu, tashi ulikwa kokuhapupala kwomuvalu wovatalelipo ovo oo tau twikile okuya pombada keshe mudo. 
Gavena woshitukulwa shaShana Elia Irimari okwa ti oshivilo eshi osha li ashike sha talelwa po kovanhu ve fike po 1000 fiyo opo 2000 eshi  sha danwa lwotetetete mo2012. Ovakufimbinga ovo va li ve na outala ova li po 50, ashike paife omuvalu wovatalelipo komauliko aa owa ya povanhu 13000 omanga ovakufimbinga voneudo ve dule po200. Neudo okwe ya yoo ovakufimbinga va dja kondje yoilongo ngaashi koIndia nokoKenya. 
“Elalakano netumbalo okuyambula po omaulikilo aa nali twikile koo ku kolekwe omakwatafano mawa pokati kovakufimbinga novatalelipo, opo omauliko aa a kule oo a ye pondodo yopaiwna,” Irimari ta ti. 


Staff Reporter
2019-05-31 11:55:49 5 months ago

Be the first to post a comment...

You might also like...