• November 19th, 2019
Login / Register

RP ta yambidhidha Itula pethimbo lyomahogololo



WINDHOEK-Omupresidente gwongundu yompilameno yedhina Republican Party (RP) Henk Mudge okwa tseyitha kutya ngashingeyi ongundu ndjoka itayi ka thikama omahogololo guupresidente ihe otayi gandja omawi gayo komupresidente a ithikamena gwedhina Dr Panduleni Itula .

Mudge okwa ningi etseyitho ndyoka ohela ongula komeho gaatoolinkundana noshowo iilyo yongundu ye moVenduka.

Okwa popya kutya ongundu yawo oya shaina ashike okuthikama pamahogololo giilyo yomutumba gwopashigwana ashike inaya shaina nande na inaya zimina okukutha ombinga momahogololo ngoka guupresidente.

“Ashike nonande inatu shaina okuya komahogololo hoka, onkene ngaa olutu ndoka talu ungaunga nomahogololo moshilongo lwedhina ECN lwa tokola okushangitha mo omadhina nomathano gaamboka taya ka hogololwa puupresidente mwa kwatelwa tse omanga ya li ye na okukala inaye tu kwatela mo,” osho Mudge a popi ngaaka.

Konima sho a popi ngaaka okwa tsikile ko kutya ngashingeyi ongundu oyo tuu ndjoka yopapolitika otayi fala ECN kompangu yomeendelelo opo ya kale ya kutha mo edhina lyawo momusholondondo ngoka oshoka oye shi ninga shaa li paveta.

 Oya ti enenedhilaadhilo lyawo sho ya tokola kutya otaya yambidhidha Itula oondyoka kutya oya mona omupresidente Hage Geingob ta li iimaliwa moshilongo nookuume ke noshowo Aachina mboka ngashiingeyi oyo haya longo iilonga oyindji moshilongo mwa kwatelwa mbyoka tayi vulu okulongwa kAanamibia.
Mudge okwa ningi omalundilo ogendji kuGeingob kutya oshilongo kasha li shi na okukala shi li mompumbwe yiimaliwa ngika ngaashi shi li mongashingeyi ashike shoka osha etwa kookuume ke mboka a totela oopoosa dhiilonga inadhi simana dho kadhi li muuwanawa waakwashigwana.

Kakele kwaashoka Mudge okwa hokolola woo kutya ompito yoopala ongashingeyi okukala Aanamibia ya eta po elunduluko ngele tashi ya pomuleli gwoshilongo opo ya yande oshilongo shi kale inashi mbangolota thiluthilu.

Mudge okwa hokolola woo kutya ECN ngashingeyi oku li ta fundju oshigwana kutya otaya ka longitha oombapila dhokuhogolola ihe ngashingeyi otaya gandja omahokololo ga yooloka onga omatompelo molwaashi taya ka longitha omashina.

Shoka Mudge okwa ti oshi li eikwatopomutima na ito vulu nande okwiinekela olutu ndoka talu ungaunga nomahogololo ngele tashi ya pomashina ngoka.

Mudge okwa li woo a longitha ompito ndjoka okukwashilipaleka aatoolinkundana kutya Dr Iitula naye okwa zimina a pewe omawi ngoka kongundu yawo naye woo oku li a nyanyukwa sho eshitaamba oshoka oye na elalakano limwe lyokulundulula elelo ndyoka lyi li koshipundi.


Loide Jason
2019-11-08 10:19:48 11 days ago

Be the first to post a comment...

You might also like...