• November 19th, 2019
Login / Register

Yaali ya kanitha oomwenyo moshiponga shohauto


Victoria Kaapanda 

ONGWEDIVA-Aalumentu ye li yaali oya hulitha moshiponga shohauto Osoondaha ya zi ko, mondjila enene yopokati kOgongo nOshikuku moshitopolwa shaMusati.

Omugandjimulombo nomugandji gomawuyelele moshitopolwa shaMusati Sergeant Liinekela Shikongo okwa ti oshiningwanima shoka osha li sha holoka potundi 19h10 yokonguloshi momukunda Oshipanda moshikandjohogololo shaShikuku.

“Okwa li kwa lopotwa kutya aalumentu mboka ya li taya hingi ohauto yoToyota Corolla taya zi kOshikuku ya thinda kombiga yokOutapi, oya li ya ipumu mumwe nohauto yoVolkswagen Amarok yiikoto iyali pomukunda Oshipanda mpoka aalumentu yaali ya hulithile,” Shikongo ta ti ngaaka.

Ta hokolola kutya nonande mohauto yoCorolla omwa li aafalelwa yane , yaali oyo ya hulitha. Omanga ye li yaali ya li ya falwa koshipangelo oshinene shaShikuku, noye li monkalo yi li hwepo.

Omulumentu ngoka a li ta hingi oAmaroka gwomimvo 42 ngoka taku hokololwa kutya omulongi posikola yosekondele poNuuyoma, okwa li a kamona epango lyomeendelelo koshipangelo shaShikuku, naye oku li monkalo yi li hwepo.

Oonakusa oya li yatongololwa nomadhina Shapumba Gidion (26) oshowo Lukas Shinana (46), naakwanezimo yawo oya tseyithilwa.
Kape na natango uuyelele kutya olye e na epuko opo iihauto mbyoka yi ipume mumwe, nomakonakono gopolosi oge li metifa.


Staff Reporter
2019-10-02 07:44:36 1 months ago

Be the first to post a comment...

You might also like...