Windhoek- Okandidate yi ithikamena Omundohotola Panduleni  Itula okwa ti aagundjuka otaya ka kutha po oopelesenda 40 dhokabinete ke. Itula ta ti oopoosa dha simana mokuninga omatokolo mepangelo odhi na okukala dhi na oopelesenda 40 dhaagundjuka. Ta ti aagundjuka oyo oyendji moshigwana noye na oonkondo dhokukala oyo taya pangele ngele tashi ya kokuhumitha komeho eliko. Ta ti oshitopolwa shika osho unene sha dhengwa ngele tashi ya kokwaa na iilonga.

“Shika osha etwa sho pwaa na omukalo gu ukilila okukandula po oshinima shika. Uupyakadhi uunene owo mbuka kutya mboka taya ti oye na onkwa naagundjuka kaye shi shoka sha halika kaanyanyamagulu. Kape na nando omuntu gumwe ngoka e li mopolitika paife a pule kutya aagundjuka oya hala shike, nenge kutya oya hala iinima yi longwe pamukalo guni nuunake ya hala sha longwa,” Itula ta popi ngaaka.

Itula ta popi wo kutya ota kala ashike e na oominista 12, ta ti yane nenge ye vule po oye na okukala aagundjuka, mwa kwatelwa omuprima ngoka ta kwatakanitha iilonga yooministeli adhihe. Ta ti mokuteta omwaalu gwooministeli, otaya ka pata wo omahangano 30 ngoka taga yaminine epangelo. Ta ti aaniilonga ayehe otaya ka kala niilonga sigo oompoka epangelo lya mana okuninga omalunduluko.

“Oshinakugwanithwa shetu shotango okukandula po epangelo ndyoka lyi itula miilonga yokudhengela ondhi peho mokushunitha pevi omwaalu gwooministeli osho wo omahangano gepangelo ngoka taga longo iilonga ya faathana nenge itaga longo sha nokuli,”Itula ta popi pethimbo ta pititha ondungethaneko onga okandidate yi ithikanmena mOlyomakya pokapale ketanga kaHavana. Itula okwa li wo a ulike okakalata ke koSwapo nokwa ti ita ka ikutha mo mongundu. Ta ti kape na ngoka te ke mu kutha okakalata ke, na ita ka ikutha mo moSwapo nenge pe na ngoka te ke jmu tidha mo.

Itula ta ti okwa hala okupititha oprograma yokutunga omagumbo opo aakwashigwana ya kale ya gamenwa. Ta ti ope na omahala ngoka taya ka pa mboka yaa na omagumbo. Ta ti oshilongo nashi ilongele kiilongo iikwawo mbyoka ya li yi na uupyakadhi ngamboka opo yi kwathele mokutunga omagumbo.

Itula ta tseyithile wo oshigwana kutya ita ka kala megumbo lyepangelo manga inaa pititha oprograma yokutunga omagumbo. “Onda panda oku ka kala nookuume, naashiinda yandje moKatutura,” ta ti ngaaka.
Itula ta ti uuna okutunga kwa pwa aantu otaya ka kala mo momagumbo ngoka notaya ka futa olusheno nomeya. Ta ti ito vulu okulanditha po egumbo lyoye. “Ito vulu oku li landitha po kakele kepangelo. Oto vulu oku li pa aana yoye nenge omuntu gulwe ashike ito vulu oku li landitha po.

Itula ta ti ote ke ya po noprograma yokukonga iilonga. Ta ti aalongwa oyendji kaye na iilonga noya pumbwa okuyambidhidhwa noshimaliwa opo ya vule oku ka konga iilonga.
 “Nando oho zi moWindhoek, ou na okulongitha otaxi wu ka gandje oondokumende dhoye nowa pumbwa ookopi nosho tuu,”

Ta ti elelakano lye okukala omupresidente okutula oshilongo monkatu ombwaanawa nokugandja uupresidente kwaangoka a landula ko uuna oshikako she sha pwa ko.