Victoria Kaapanda
OSHAKATI-Aantu oyendji mOshakati oye li monkugo yi na onkambe sho omalukalwa gawo ga yelulwa komvula onene ndjoka ya monika moshitopolwa.
Omvula ndjoka ku niwe uutile kutya otayi etelele efundja, oya thiminike oyendji ya thige po nokuli omalukalwa gawo oshoka omeya oga thika sigo omomagumbo.
Omukuluntu gwomakwatathano mOmbelewa yElelo lyoNdolopa yaShakati Katarina Kamari okwati Elelolo lyoNdolopa olya ilongekidha oku tembudha mboka taya ka adhika kefundja –ashike ha ngashingeyi.
“Shoka otashi ka ningwa ashike uuna efundja lye ya shili, oshoka kape na natango uyelele wa gwana ngele efundja otali ya. Otwa longekidha omahala kEhenye extention 12 oshowo kEkuku hoka tatu ka gandja ootenda, uundjugo nomeya,” Kamari ta ti ngaaka.
Ta gwedha po ta ti oya dhengelwa oongodhi mombelewa yawo kaakwashigwana kutya oya yulilwa komeya, naanilonga yawo oya tameka okupopola omeya mpoka ge na okuningilwa oondjila dhomakungulukilo.
Kamari okwa ti mboka yali ya indile oku etelwa omavi momahala gawo omolwa omeya, pompito ndjika itashi shiwa oshoka kaye na natango ehala lyokukutha omavi, ihe otaya ka kwathela mbonga yeli monkalo yi nyanyaleka.
Onesmus Paulus gomOshakati shokUuninginino okwati otaya mono ihuna komeya ngoka taga mbomboloka okuza kooha dhopate guuka momagumbo gawo.
“Uupyakadhi mbuka otwa kala nawo ethimbo, otwa kala nokuwulopota kElelo lyoNdolopa oku za oomvula dha pita, ihe oya kala taye tuya mukula kutya mbyoka kayi shi ilonga yawo ihe ilonga yehangano hali longo opate, Road Authority (RA),” Paulus ta ti ngaaka.
Ahokolola tati omvula ya ziko muNovemba, okwali akutha onkatu opo aka popye nomupehakuluntu gwElelelo lyoNdolopa Kornelius Kapolo opo akanyenyete uudhigu wawo kutya otaya si omeya.
Paulus tati Muni okwali atumuko okaloli hoka kaningo kamukanka okashona komeho gegumbo ihe inakakwathelasha.
Gumwe gwomanegumbo okwati, okwakalapo oomvula odhindji pehala mpoka, ihe inaya mona nale ihuna yomeya mohofa yawo.
Tati shoka oshatameke ashike sho opate yalongululwa ihe inaya thigapo ondjila kohi yopate okupita omeya gaye kombinga ndjiya yopate.
Lovisa Nainda okwali alombwele Kundana tati, oyena uumbanda okukalonga iimpwiyu yilwe kondje yegumbo oshoka egumbo olya dhingolokwa komeya.
“Otuna uumbanda okuya kokule negumbo oshoka atu adha uunona wasa omeya. Kehe thimbo atukelele ashike oshoka omeya oga manako ohofa ayihe yegumbo,” Nainda ta ti ngaka.
Agwedhapo tati omasiku ga pita, angala yakanitha omwenyo gomunona gumwe ngoka ya kala ethimbo nokumukonga nani okuli ashike kohi yomeya tadhana shoya katala omutse ashike yewete.
Oongeshefa moshakati otadhi shongola, oshoka uutala owuli kohi yomeya, hoka ookasitoma dhimwe itadhihala okuya opo dhi lande shoka yahala.
Helena Nakathingo ngoka ena okatala kiilandithomwa molukanda Uupindi okwati, oya tambulako ashihe. Omvula ngele otayiloko nayiloke ashike itaya hulithapo okulanditha.
“Otuna okushingitha ashike opo tumone omboloto. Ngele otwa kala tuli momagumbo medhina lyomeya katuna sho tatulilemo,” Nakathingo afatulula.
Mpingana Nashima ngoka naye talanditha puutala mpoka okwati ota indile Elelo lyoNdolopa opo liya tutilepo evi pomahala gawo, opo omeya ngoka ta ga zi konima yuutala ga shune monima.
Nainda okwati okavula ashike okashona ka loko okutameka mehulilo shiwike, ihe omeya oga tameke nale taga mbomboloka guuka momagumbo nosho wo moongeshefa, unene tuu momagumbo nomoongeshefa ndhoka dhi li kooha dhondjila onene ya za pomahooli gaKatana ya taakana mOshakati shokUuninginino nomolukanda lwUupindi ya thinda kOkahao.
Omvula ngele ya tsikile okuloka unene nenge kwe ya efundja, aaShakati oyendji otaya ka ya kohi yomeya