Epangelo laSouth Africa ola hala okuya komesho nomalongekido okuninipika omuvalu wovanailonga vepangelo, ovo okupitila meendjabi hava longifa po omuvalu munene woshimaliwa shepangelo oo u fike peebiliona R600‚ hano eepelesenda 35 doimailiwa aishe oyo hai longifwa kepangelo, omudo keshe. 
Minista e lile po ovanailonga vepangelo Senzo Mchunu okwa holola pefimbo a li ta nyamukula omapulo mopaliamende kutya oshimhungulonga shaye otashi tale kutya otashi longifa omukalo ulipipo opo shi shunife pedu oshimaliwa hashi longifwa kepangelo meendjabi dovanailonga vepangelo, nosha mona kutya okutula ovanhu mopenzela kuyele oku li shimwe shomwaayo tava dulu okuninga.  
MuJuli wodula ya dja ko, oshimhugulonga eshi osha li sha tya ovanailonga vepangelo ve li pepipi li dule peedula 60, otava ka pewa ondjabi ya wedwa po onga etwomukumo opo ve liyambele okudja moilonga diva. Eshi osha ningilwe ashike osha eta opo omafaneko mivalo oshimaliwa a pitilile neebilona R30.   
Ooshikondo eshi osha ti otashi ka twa omukumo ovanhu opo va ye diva moshipundi shoukulupe tashi shi ningi nokuweda ko oshimaliwa koshimaliwa shavo shopenzela. 
Vali, otashi ka talulula omukalo oo hau longifwa kepangelo okufuta eendjabi dovanailonga. 
Nonande epangelo ina li holola kutya oilonga yovanhu ve fike peni tai ka kumwa koshinima eshi, oshikundaneki shoBusiness Today osha lopota kutya ngeenge epangelo otali dilaadila okufikifa omavalulo eendjabi depangelo poshimaliwa shi fike peebiliona R30, osha hala kutya ola pumbwa oku shi shunifa pedu neebiliona R10, naashi otashi ti kutya ovanhu ve li omayovi ovo tava ka dja moilonga.