Paheja Siririka

WINDHOEK-Kuyele nuumvo Vikta JuiceBoy okwa li a pititha oalbuma ye yosheeli yedhina Bless Up ndjoka yi li tayi adhika moositola odhindji moshilongo osho wo kointaneta. Vikta Juiceboy, a tseyika nawa onga Victor Moses, okwa li a luku oalbuma ye Bless Up, shoka shi na sha nokutaamba ko onkalamwenyo. “Oshi na sha ashike nokutaamba ko omagano gonkalamwenyo. Nonando pe na iipyu niitalala, omaudhigu, enyanyu, nakehe tuu shoka hashi kokoloka sha lamba mo. Osha hala wo okutya kala aluhe wu na etimaumbwile.

Oalbuma oyi li kombinga yokupandula nokukala wa tala onkalamwenyo neho lyetumaumbwile,” ta ti ngaaka. Omunamimvo 21 nguka e li momvula yahugunina koshiputudhilo shoNamibia University of Science and Technology ta ti inashi mu pula naanaa olule okuya po noalbuma. “Osha pula ndje ngiika omvula. Onda tameke oku yi longa muFebuluali 2018 nomuFebuluali 2019 onda li ndi na oongalo 47 moka nda li nda hogolola,” Vikta ta fatulula ngaaka. 

Okangalo hoka e hole moalbuma ndjika o ‘Been There,” “Okangalo oka-11 moalbuma. Muka ota popi kombinga yaKalunga noku mu tanga sho he mu kwathele momalweendo ge agehe.
Okwa longa pamwe naahikingalo ooyakwawo ngaashi ML, Neslow, K-dio, Tk the Rapper, King Elegant, Slime, Princelou, Odie the Poet, C-square naKay Rock moprojeka ndjika.