• August 4th, 2020
Login / Register

A dengwa omido 10 mokakuma konima yokumakela emanguluko



Konima ashike eshi a lavela emanguluko oule woshivike, omunambelewa mopolifi yoshilando shaWindhoek, okwa ndwangulwa omido 10 konima yekumba molwa oshibofa oshitivali shedipao –nomoshikando omu olokamatyona komido 17.
Omupanguli Dinnah Uusiku, okwa pa Johannes Sheetekela Werner ehandu lodolongo –omo ye novanailonga pamwe naye va dipaa okamatyona komido 17. Oibofa ei ivali oye lifiya po ashike nomido mbali nomafiku ahetatu. Werner (36), okwa hangwa ashike opo a efiwa oshivike shadja ko molwaashi ina monika ondjo medipao lomukadi Taleni Hamukwaya –Werner (29) oo xulifa momafiku 24 Apiilili 2015.
Magestalata Surita Savage oo a mangulula Werner mediapao lomukadi ka li a mona omupolifi ou ondjo, ta ti “mupya munene kape na oumbangi” tau ulike kutya efyo laTaleni ola enda ngahelipi. “Osho tu na po okafekela ashike, nomadilaadilo kutya shiimba oshike sha ningwa po. Oumbangi ou u li po oyou ashike wombangi yepangelo, nowomutamanekwa ye mwene.” 

Omakonaakono a ningwa okwa li a ulika kutya Taleni okwa fya a ehamekwa komutwe. Nepangelo ola li la patululila Werner oshibofa shedipao, ile ponhele yaasho pa ye oshibofa shedipao liheshi loshiningilawina, okushinga nouhasha nokudopa okufikama ponhele yoshiponga. Ashike Werner ye mwene okwa li a hokolola kutya mefiku loshiningwanima osho sha ningilwa kolukanda laDonkerhoek okwa li a ya komukainhu, kaume kaye oo e li yo omunailonga pamwe naye, Rosalia Eliphas. Ta ti vo na Eliphas kave na nande ekwatafano lopaihole. Ta hokolola kutya kuEliphas okwa li a ya ko a ka tala oshapi yonduda yaye nelalakano oku ka nangala konhele yaElifas, oo pefimbo opo a li ta talele po koDonkerhoek. 
Ta ti manga a li ta popi na Eliphas, Taleni okwa holokela po ponhele opo, ta ula Eliphas kutya ota piyaaneke ohombo yaye. Ta denge Eliphas noshipala, naEliphas okwa faduka po na Taleni okwe mu totela, ta dingonoka otuwa, fiyo Eliphas teshi pondola oku nhukila motuwa yaWerner a li omutumba moshihauto shaye pefimbo loikolokosha. Werner vati okwa shinga ta di po ngeno pohele opo ashike e shi a ka tala konima okwa mona Taleni a nangala mopate. Okwe mu kufa po noku mu twala koshipangelo konima eshi a pita keumbo lamumwainaona umwe Taleni okwa ka fya konima yomafiku ane. Eliphas, Werner naTaleni ovo aveke va li po poshiningwnima opo, naEliphas oye a li ombangi yepangelo.

Nonande Werner a mangululwa oshivike shadja ko, onghela omulumenhu ou opamwe novapolifi vakwao Kleopas Kapalanga naElia Nakale ova patelwa mo molwaashi va dipaa okamatyona Mandela Ramakutla. Ava otava ka longela odolongo oule womido 10, oku tameka onghela. Ovanambelewa ava vati ova li va denga neenghono Ramakhutla momafiku 16 Apiilili 2013, eshi va li tave mu pulaapula kombinga yoinima ya vakwa meembelewa daMuni waWindhoek.  Ovapolifia ava vali ve li moilonga pefimbo loshingwanima vati ova ehameka okamatyona neenghono, ndele tave ka twala koshipangelo oko ka ka xulifila konima yomafiku ahetatu. Ava ova li yoo tava pangulilwa ekwatopo mbabyona nonghendabala yoku ya ouyuki moshipala. 
 


Staff Reporter
2020-07-09 09:19:53 25 days ago

Be the first to post a comment...