• November 19th, 2019
Login / Register

A dhipaga yina, omukulu gwe nomutekulu



Victoria Kaapanda naNuusita Ashipala

EPATULULO -Aakalimo yomomukunda Epatululo mOkatope oyali ya penduka nonkundana yinyanayaleka sho omulumentu gwomunyasha anuwa a dhipaga aapambele ye, yeli yatatu nekatana noku ehameka noonkondo okanona kamwe oka ke li monkalo ombwinayi koshipangelo.

Oonakusa oyo omunamimvo 61 Vilgenia Teofelus, Simon Petrus (30), naNdapandula Ndahalaovanhu Hafeni e na omvula yimwe.

Shi ikwatelela kehokololo lyopolisi moshitopolwa shaHangwena oshiningwanima shika tashi zitha omahwilili, osha ningilwa pomukunda Epatululo guli popepi nOnaame pOkatope, oku pendukila ohela.
Otaku hokololwa kutya omulumentu nguka anuwa okwa dhipaga, yina, omukulu gwe, okatekulu ke, e ta ehameke okanona kamumwayina eka teta oonyala dhokombinga yimwe nokugulu. 

Okwali tsikile niikumithilonga ye sigo okoshigunda shiikombo hoka a tete ko iikombo yili ihetatu omitse e ta dhipaga ishewe okambwa komegumbo.

Aanona yaali mboka yomimvo heyali nokakwao komimvo omugoyi mboka oyo owala ya hupu mo megumbo uusiku mboka, oya matukile puushiinda mpoka ya ka holama. Omulumenhu ngoka anuwa okwe wu landulile ko kuushinda, ihe elago enene aashiinda oya adhika ya ipatela mo megumbo.

Omufekelwa nonande okwali a matuka po konima yoshiningwanima shika, okwali a mangwa kopolisi ethimbo lyongula yesiku ndjoka, a adhika ta ende u uka kopate. Ekatana ndjoka a longo nalyo iikulumuna mbyoka anuwa okwa adhika e li holeka kOkelembe, omukunda gu li puushiinda noEpatululo. 

Omukalimo gumwe gwomomukunda moka, ngoka edhina lye li shiwike kuKundana okwati, onkundana ndjika yinyanyalitha oyali tilitha aantu momukunda. 

Ta ti sho yakala ye shi omulumentu ngoka ina kala ngeno e na uuvu womomadhiladhilo.
Anuwa okwa ningile ngaa esiku a za po keehe po pegumbo, naasho a galuka anuwa oshiwike sha za ko, okwa kala ta lombwele yaandjawo kutya ite ki imangeleka oshoka ope na aantu haya kale ye mu kundukidha yah ala oku kondja naye. Ethimbo limwe oha kala ta a fa ta kondjo naantu mboka, ashike aantu mboka oye owala a kala eya wete. 

Opolisi oyali yapopi kutya, ooyina nuunona mboka wali wa adhika megumbo ethimbo ndoka oyali matuka po, noku kapopilwa puushinda.

  Shoka etitha uukolokoshi mbuka inashi shiwika, nuuyelele ngele omufekelwa oku na uvu womomadhiladhila inawu shiwika natango oshoka omakonakono gopolisi ogeli metifa.  
Omulumentu nguka okwa tegelelwa oku holoka ongula mompangulilo yaMangestalata mEenhana moka taka tamanekelwa iipotha yedhipago lya kwatelwa kumwe nomahepeko gomomagumbo. 


Nuusita Ashipala
2019-11-06 07:45:05 13 days ago

Be the first to post a comment...

You might also like...