• November 13th, 2018
Login / Register

Aadhipagi kaye na oondunge dhopamaiyuvo


ONGWEDIVA - Nonando inapa ningwa omapekaapeko gomuule okuholola kutya omolwashike naanaa omadhipago gaakiintu naanona taga londo noonkondo moshilongo, omundohotola monkalathano Armas Abdul Malik Shikongo okwa ti osheetithi oshinene shiimbuluma mbino osho okwaa na oondunge ndhoka hadhi longele pamwe nomaiyuvo. 
 Shikongo shika okwe shi popi sho a pulwa kuKundana a tye ko sha kelondo lyiiningwanima yomadhipago niikulumuna tayi ningilwa aakiintu naanona. 

Ta ti opo ku adhike ekandulepo lyomukundu kiinima mbika, oshigwana ashihe mwa kwatelwa aanongononi yopankalathano yomaithano ga yooloka nosho wo iikundaneki oya pumbwa okulongela kumwe opo ya taandelitha ontseyo ndjoka tayi hwahwameke omayihumbato omawanawa moshigwana.

Ashike epangelo olya pumbwa okukwatela komeho ehwahwameko ndika, mokukwatha aapekaapeki opo ye ye po nekandulepo lyomukundu tali kalelele. 

Shikongo ta ti, ye nomuniilonga pamwe naye koUniversity yaNamibia, oya li andola ya tokola okuya po nepekaapeko moshinima muka, ihe oya li ya hulila muunyengwi, oshoka inaya mona ekwatho lyoshimaliwa opo ya tsikile.

“Ashike sho twa ningi omakonaakono guunamambo otwa mono kutya oyendji yomaantu mboka haya longo iikulumuna mbika, aantu mboka ya za koshikondo shegameno. Otwa mono ishewe kutya ope na iitopolwa yontumba omo unene hamu ningwa omadhipago gomaludhi ngoka. Ashike ngele oshe ya kuukwatya womuntu, oshidhigu oku adha ethikilo lela opo u tokole kutya mbela omolwashike aantu yontumba haya ihumbata momukalo gwongandi. Shila ongela owala to ningi omapekaapeko gopaunongononi,” Shikongo ta ti.

Ashike okwa ti oshinenenima osho shoka kutya aantu mboka haya longo iikulumuna mbika kaye na oondunge ndhoka hadhi longele pamwe nomaiyuvo ndhoka hadhi eta omuntu opo a kwatwe kolukeno ye a igalule opo kaa longe oshimbuluma. 
Ta ti ota fekele wo kutya yamwe yomaadhipagi mboka ye li iilyo yopolisi nenge yetanga lyegameno ohaya nyengwa okuyoolola pokati kokukala omukwiita ta lwitha omutondi ngoka ya dheulilwa nokukala omukwashigwana e na oondunge ndhoka hadhi longele pamwe nomaiyuvo ta vulu okukandula po omukundu nokupopya no inaa longitha oonkondo dholutu ndhoka hadhi eta sigo omonkatu yedhipago. 

Ta gwedha po ishewe kutya mboka haya ningile aanona aashona iikulumuna yoludhi nduka ohaye shi ningithwa kuuwaya wonewene, ya nyengwa okutaalela aantu mboka yepipi nenge yomuthika gwao, sho osho nee haya fululukile mokukwata aanona koonkondo, oku ya dhipanga nenge oku ya miihulo niinamwenyo.

Oshiwike shika osho ashike, konyala aakiintu yatatu nokanona kamwe oya dhipagwa kaalumentu mboka ya li ya tala ko onga aaholike yawo, aavali nenge aashiinda. 
Yaali yomaalongi yiikulumuna mbika oya ikutha omwenyo konima yiimbuluma. 
 


New Era Reporter
2018-11-09 10:11:11 4 days ago

Be the first to post a comment...

You might also like...