• August 25th, 2019
Login / Register

Aalongwa aakulu pErundu oya hala oku tungulula osikola yawo



Victoria Kaapanda

ONGWEDIVA - Osikola Erundu combined opamwe naalongwa aakulu oya tokola oku tsakanena opo ya gongele oshimaliwa shoku tungula osikola ndjoka ngashingeyi ya kulupa noonkondo. 

Oongulu dho sikola ndjoka yi li mondingandinga yondoolopa yaShakati odhili monkalo ombwinayi, omakuma noofulula odha tenda omisa, oombuli dhoongulu otadhi hala oku gwamo noopainda komakuma odha guguka ko. Iipundi niitaafula yaalongi naanaskola nayo oyi li monkalo itaa yi nuwa omeya. 

Mboka ya sikola posikola mpoka oku za momumvo 1990 sigo 2000  oye li metifa oku longedha esiku lyawo enene ndjoka lya tokolwa li kale ko momasiku 13 sigo 14 ga Sepetemba nuumvo. Mbaka oya hiya notaya ka gongala pamwe noondenge dhawo ndhoka dha hiti posikola mpoka konima yomumvo 2000.

Elalakano lyoshituthi shoka sho masiku gaali, oku gongela oshimaliwa shoku opaleka nokutungulula oongulu dhosikola noku dhimbulukwa pamwe omasiku ga pita.

Omukuluntusikola Festus Kandjala okwali a lombwele Kundana ta ti oshituthi shoka otashi ka tameka potundi 10H00 yongula nokugandja omayele nomapukululo kalongwa yo ndondo ontimugoyi nondondo 12, no komatango oku tameka potundi 18H00 otaya ka kala ye na uulalelo wominga ano “gala dinner” hoka ta ku ka tamekwa negongelo lyoshimaliwa. 

“Esiku etiyali, oku za potundi 07H30 otatu ka kala tu na osheendo shombili oku za pomatungo gaShalli, a tu piti pomatungo goYetu sigo oko kamba yaakwiita, e tatu galukile posikola lopo tundi 11H30 tse tu tsikile noshituthi shetu,” Kandjala ati ngaaka.

Ta gwedha po kutya kehe ngoka a hala oku yambidhidha esiku ndoka lyohungi okwa manguluka oku thika, ta ti oya niga ngaa onkambadhala sigo oompoka taya vulu, oku hiya aanangeshefa aanene naashona, naakwashigwana miikondo oyindji ya yoloka opo yaka yambidhe noku uvaneka shoka taya ka vula oku yambidhidha nasho.

Kandjala ta ti esiku ndoka otali ka kala ewanawa noonkondo. “Otatu ka kala omayinyanyudho ga yoloka ngaashi okakadhona dhingi mokukatuka oku  za  kosikola dhopushiinda, omawudhano ga yoloka oshowo ota kuka landithwa iikulya yomaludhi ga yoloka nuungalo mboka tawu endele pamwe nethimbo.”
Aalongi yosikola pErundu otaya ka topolwa moongundu sho taya ka dhana ya talelethana nalongwa aakulu momawudhano ga yoloka.

“Osikola yetu oya kala tayi shi enditha nawa melongo oomvula dha piti ihe natango otayi shi enditha nawa unene. Otuna aalongwa yeli 1 200 oshowo aalongi sikola yeli 50 mwa kwatelwa aaniilonga yamwe yiili.
“Osikola oya talela omaudhigu ogendji ngaashi iilongithomwa yosikola, ookompiyuta niikwawo oyindji. iipundi niitafula moongulu oya teka otwa pumbwa yimwe iipe,” Kandjala ta fatulula. 


Staff Reporter
2019-08-13 07:36:11 11 days ago

Be the first to post a comment...