• June 2nd, 2020
Login / Register

Elelondoolopa lyaMuthiya moshikumungu shokakombo noludhi


OMUTHIYAGWIIPUNDI –Ookansela yelelo lyondoolopa yaMuthiya natango otaya finyaanfinywa miinima ya nika uukakombo noludhi, sha landula anuwa sho ye na mo olunyala noku idhopa mo mokukuta omunambelewa gwoonzo dhaantu (human resources officer)osho wo omutaleli guundjolowele womudhingoloko. Otaku hokololwa anuwa ookansela yamwe ya li ya tindi okukoleka iizemo yokandidate dhingi ndjoka ya li ya ningwa kaakonaakoni, omolwa anuwa aantu mboka ye shi enditha nawa hayo ya hala. Shika osha piti mo sho okakomisi ke li ompinge nuulingilingi kedhina Anyi-Corruption Commission (ACC) taka konaakona elelondoolopa ndika.

Momushangwa gwa shangwa kuwalye ngoka gwa monika koshikundaneki oshimwayina naKundana shoNew Era nogawa li gwa shangelwa ACC, maningela gwoHuman Resources and Finance Taimi Lungameni, mayola Katrina UUsiku opamwe nomunashipundi gwokakomitiye kelelo Beata Nashongo oya li ya tothwa mo onga oyo ya kwatela komeho onkalo ndjika yokakombo noludhi.

Ombaapila oya shanga kutya, “omapulokonaakono oga li ga ningwa pehulilo lyaAguste 2019, ashike ngashiingeyi elelo inali hala mboka oyo ye shi enditha nawa oshoka haya ya hala. Oya hala shi ningululwe inaapu landulwa omilandu. Ope na omilandu ashike otaye dhi ende pomunkulo. Omaningela yoonzo dhaantu niiniwe, mayola osho wo omunashipundi gwokakomitiye kelelo oyo taya ningi iinima mbika. Otaya idhopo mekuto lyaaniilonga omanga oveta yoLocal Authority tayi indike eidhopo mo ndika.”

Oshikundaneki shika kasha li sha vula okukoleka kutya aantu yangapi ya li ya yi momapulokonaakono gopoosa ndhika mbali

“Itandi vulu okutya ko sha hoka, osho Nashongo a yamukula sho a pulwa, omanga Lungameni okwa li a ti oku shi onzo naangoka a shanga ombaapila ndjoka.

“Ngashiingeyi owa hala okumona uuyelele mungame, ashike ino hala okulombwela ndje ngoka e ku lombwele shoka to pula ndje paife. Onkene ngele osho shi li ngawo, itandi ti ko sha nando,” Lungameni ta ti ngaaka, ta gwedha po wo kutya iha kutu aaniilonga.

Shika hasho oshikando shotango iipopya  yokakombo noludhi tayi holoka melelo. MuJuni nuumvvo, omukuluntuwiliki omukulu Samuel Mbango okwa li a shanga ombaapila ndjoka tayi ulike kutya open a anuwa elelo lya nkundipala, okudhengela ondhi peho osho wo okakombo noludhi melelo.
Lungameni okwa li a finywaafinywa e na mo olunyala muukakombo noludhi, sho a li a ulikwa onga maningela nando pwa li omuniilonga gumwe a li a mona oopelesenda 77,8, omanga ye a li a mona oopelesenda 66,6.

Euliko lyaLungameni otaku ti olya li lya kwatelwa komeho kuNashongo, ngoka a ti kutya okwa li a ulikwa medhina lyuuthikepamwe.
Iikumungu mbika otayi ningwa pethimbo elelo lya falwa mompangu omolwa sho lya hulitha po okontalaka yaMbango.

Oshipotha shika otashi ka uvika mompangu yiilonga mOndangwa momasiku 25 Kotomba 20919. Omwedhi gwa za ko monista gwomandepulepo gwoondoolopa niitopolwa yokuushayi oya li ya gandja omayele opo elelo lyi longe pamulandu lyo lyi ikaleke kokule nokufalwa kompangu. Ngashiingeyi oshi li ngeyika kutya elelo inali taamba ko omayele ngoka, na olya ulika ohahende yi ke ya kalele po mompangu.


Obrien Simasiku
2019-10-22 08:19:33 7 months ago

Be the first to post a comment...