• November 16th, 2019
Login / Register

Hokweni iilonga yeni, hayimaliwa…Namoloh ta lombwele aadheulwa yopolisi



ONDANGWA – Ominista yEgameno Charles Namoloh okwa li a kumagidha aadhewulwa 700 mboka ye li taya dheulilwa uupolisi uule woomwedhi 12 kendiki lyomadheulo lyaRuben Danger Ashipala yi iyageke okuya metanga lyopolisi nelalakano lyiimaliwa. Minista ta ti aadheulwa mbaka naya kwatelwe komeho kohokwe nehalo okukwathekla oshigwana shaNamibia.

“Inamu ya huka mu kandule po omaluhepo geni. Kala u na ohokwe okukala omunambelewa gwopolisi. Ino ya huka oshoka owa hala okumona ocheke, shoka nashi kale ashike oshinima sha gwedhwa po,” Namoloh ta ti ngaaka.

Namoloh okwa li ta popi peegululo lyopambelewa lyedheulo pOndangwa ohela.
Namoloh ta ti wo mboka ya hala okulongitha opolisi onga oshilondelo shawo okumona oompito oombwanawa ya thige po omadheulo, ta ti uuministeli owa tula mo oomiliona N$2 mokunduluka po okoosa ndjika. Ta ti osha ninga omukalondjigilile moka oohandimwe haya yi mopolisi yo taya tameke okupula ya yelwaayelewe muule ashike woomwedhi ndatu nokulongitha omukalo nguka opo ya ikuthe mo miilonga ya ka longe pomahala galwe. “Ngele ou na edhilaadhilo ndyoka, onda hala wu ze mo ashike ngashiingeyi oshoka itatu ku yelaayela muule woomwedhi ndatu na itatu ka gwedhela ondjambi yoye muule wethimbo lyoomwedhi ndatu. Onda hala wu ze mo ashike paife opo ito ke tu pa omukundu konima ngele wa mana edheulo lyoye,” Namoloh ta ti ngaaka.

Minista oikwa li wo a pula nokukumika aadheulwa mbaka yi ikaleke kokule nokukutha ombinga miimbuluma, ta popi a tala sho aapolisi 20 moWindhoek ya li ya kutha ombinga miimbuluma noya li ya mangwa po. Ta pula wo ya kale taya ihumbata nawa, nopethimbo ndyoka kaaye li miilonga. Te ya indile ya gamene omaliko gepangelo omanga ye li momadheulo gawo.

Ta popi wo peegululo ndika, omukuluntu gwopolisi yaNamibia Lieutenant-General Sebastian Ndeitunga okwa ti edheulo ndika olya ninga oomwedhi 12 ngashiingeyi opo ku kwashilipaleke kutya olya adha oonkatu ndhoka dha tulwa po dhuupolisi muudemokoli.

Ta ti etamununo lyedheulo ndika otali gandja omadheulo ngoka taga yamukula komaudhigu guuthemba womuntu, iimbuliuwma ya ya pombanda, iipotha tayi ekelwahi omolwa uumbangi inaawu gwana omolwa aapolisi yaa na uunongo wokuninga omapekaapeko nosho tuu.
 


Nuusita Ashipala
2019-10-25 08:31:26 21 days ago

Be the first to post a comment...

You might also like...