• June 5th, 2020
Login / Register

Hym awards ta longekidha omathigathano goondjimbolwiimbo



Victoria Kaapanda 

ONGWEDIVA-Omunangeshefa Omunamibia gwehangano Beyong  Horizon Investment cc, Ndali Nenkavu oshowo omwiimbi goongalo dhopambepo, okwa tokola opo a gongaleke aanalwiimbo ayehe moshilongo opo ya ka tyapule ethigathano lyomalwiimbo pamwe.

Ethigathano ndyoka otali kala hali tyapulwa omumvo kehe, ndyoka tali ka tameka momasiku 10 -11 Mai nuumvo mendiki lyoTrade Fair yaNgwediva, hoka kwa tegelelwa aayimbi yomalwiimbo oshowo aayimbi yomayimbilo gopambepo ya kale ya thika oku za koombinga noombinga adhihe dhoshilongo.

Nenkavu ta ti, nonando nuumvo oshituthi shino otashi dhanenwa moNgwediva, kehe moshitopolwa oshi na oku ka tyapulilwa mo momimvo dha landula ko.

‘Elalakano lyandje okuya po nedhiladhilo ndino, okukumagidha aalumentu oshowo aanyasha okuhulitha po omadhipagathano oshowo omahepeko ga talela oshigwana mongashingeyi. Okuhulitha po okuninga omapunda omanga ye li moosikola, okuthiga po oosikola oshowo oku ekelahi uunona”. Nenkavu ta ti ngaaka.

Ta gwedha po ta ti oku na eyitaalo lela kutya okupitila momathigathano gomalwiimbo aanyasha otaya vulu okuteka mo sha oshowo okutameka oondjimbolwiimbo ndhoka tadhi ya kaleke kokule niinima iiwinayi ya taalela oshigwana.
Ethigathano ndyoka tali ithanwa Hymn Awards otali ka kala li na oongundu dhi li nodhi ili ndhoka tadhi ithanwa best hymn, best solo, best Instrumentalist, best gender ballanced  choir.

Otapu kala  omayimbilo ge li gaali ngoka ga hikwa kAanamibia, taga ka imbwa koongundu adhihe onge ethigathano. Otaku ka gandjwa oshipalanyolo  shoka, oongundulwiimbo tadhi ka tota okayimbilo koovelisa ndatu, hoka taka ka hogololwa mo notaka ka gwedhwa komahimbilo ngoka ge li gaali ga li ga ningilwa ethigathano.

Nenkavu ta ti omayimbilo ngoka gongushu notaga ka kala ge na omatumwalaka taga tungu oshigwana otaga ka ningilwa embo ndyoka tali ka gandjwa kuuminsteli welongo opo li kwethele aalongwa miilongwa ngaashi yoLife Skills oshowo pomahala ogendji ngoka taga ka pumbwa uuyelele awuhe wu li mo.

Hymn award okwa gandja etumwalaka moshigwana kutya kehe ngoka ta vulu okuyambidhidha omalwiimbo ngoka gaye komeho oshowo okugandja okashona hoka ye na po , unene aanangeshefa nomahangana omanene na ya kale ya kwatathana na  Nenkavu ko nomola  081 258 1073.

Kehe ngoka taka yambidhidha okwa tegelelwa a ka etelele kehe shoka tashi vulu oku ulika nokuyambulapo ongeshefa ye. Oondjimbolwiimbo ndhoka dhi na uuCd nosho tuu oya manguluka okulanditha omasiku ngoka.
Omayishangitho oge li metifa natango, onkene oondjimbolwiimbo ndhoka dhi na oku enda, opo dhiye  methigathano ndoka.    


New Era Reporter
2019-02-22 11:19:00 1 years ago

Be the first to post a comment...