• November 15th, 2019
Login / Register

Inamu longitha omahauto gepangelo pambambo-Geingob



WINDHOEK-Omupresidente gwoshilongo Hage Geingob okwa lombwele iilyo yokabinete yi longithe nawa omahauto ngoka ya pewa kepangelo opo ya yande okunyateka edhina lyepangelo.

Ndhika okwe dhi thamuna sho ali ta popitha iilyo yokabinete momutumba gwotango gwokuninga omatokololo  kegumbo lyepangelo  ongula yEtiyali.

Geingob okwa hokolola kutya nonando aanamapangelo mbaka oya  pewa uuthemba okulongitha omahauto ngoka ngaashi ya hala,  kasha li mondjila okulongitha omahauto ngoka iinima ya puka.

Yimwe yomiinima mbyoka inayi nyanyudha omutse gwoshilongo ongaashi , oohauto oonshona tadhi longithwa okutulwa oosamende , noshowo okututitha oohauto dhepangelo iikulya yoongombe.

“Inamu kankameka we omahauto gepangelo pomahala ga puka ngaashi puundingosho noshowo okutaaguluka oongamba kasha li paveta shaashi omuntu owa hala oku iyulika,” osho a lombwele aatotiveta ooyakwawo.
Kakele kwaashoka Geingob okwa hokolola woo kutya ye ina hala okupewa ootundi kombinga yoombashu oshoka ye onkalo yomoombashu okuyi shi nawa oshoka omo a valelwa.

“ Ngame onda valelwa moombashu, omo nda kokela ndele natango omo handi yi nomauhuto gandje gopaumwe andi ka taalela po. Otamu vulu okukwashilipaleka naatonateli yandje. Ashike sho handi yi ko ihandi mu lombwele oshoka inashi pumbiwa,” osho kakukutu komatanga a hokolola ngaaka ye a taalela nduno aatotiveta ooyakwawo mboka ya li ya ende omutumba ngoka noshowo aatoolinkundana.

Geingob okwa li ta hokolola ndhika sho ta popi kutya aakwashigwana yamwe oye li ko taye mu sheke kutya ota longitha oombashu onga omukalo gwokumona omawi ogendji pethimbo lyomahogololo.
Namibia okwa tegelewa a ka kale nomahogololo kehulilo lyomumvo nguka moka Geingob ta ka thikama pamwe naaleli yoongundu dhoompilameno pomahogololo gopaupresidente.

Okwa hokolola kutya ye okwa ti ashike ina hala we oombashu moshilongo oshoka aantu ayehe oya pumbwa okukala ye na olunyala kiipumbiwa yonkalamwenyo ngaashi, omeya , uundjugo noshowo olusheno shi keelele etaandelo lyomikithi hadhi zi mekako ngaashi Hepatitis E noshowo efiko lyoombashu .

 Koshinima sha yooloka Geingob okwa hokolola kutya oku na euvonayi kutya aatokoliveta yamwe ihaya okutsakanena naanangeshefa yokondje nomeni lyoshilongo mboka ya hala okukutha ombinga meliko.


Loide Jason
2019-02-08 13:08:57 9 months ago

Be the first to post a comment...

You might also like...