• July 20th, 2019
Login / Register

MOranjemund omwa pumbwa ofikola yepangelo – Nangolo



Oranjemund - Kansela woshikandjohoololwa shOranjemund naRosh Pinah Lasarus Nangolo, okwa indila opo epangelo li katuke mokutunga ofikola yepangelo mOranjemund. 

Paenghundafana odo a ninga naKundana Omaandaha oshivike eshi, Nangolo okwa tumbula kutya, otashi nyemateke neenghono, eshi fiyo oshivike oshitivali shaFebuluali, moshikandjohoololwa shaye mu na ovanafikola inava tameka natango ofikola omolwa eenhele itadi wanene ounona mofikola oyo i li mo imwe aike yepangelo mOranjemund, Ambrosius Hamutenya Combined School.

Nangolo ota tumbula kutya omafaneko okutunga ofikola yepangelo mOranjemund okwa dja nale, pefimbo kuliwe mondjila yokuyeulula odoolopa oyo tuu oyo pambelewa. 

“Ofikola oya li i na okukala ya tungwa nale, omivelo okuya kOranjemund oda yeululwa  pambelewa mo2017, okudja opo ovanhu vahapu otave uya kodoolopa naavo va kala mo nale modoolopa ova ufana omaludalo avo okudja keembinga neembinga e uye a fikole mOranjemund.
Eshi hatu popi ngaha ope na ounona vahapu vehe li mofikola inava dula okutambulilwa mofikola oyo i li mOranjemund.” Nangolo osho a tumbula.

Ota ti epangelo ola tula po omalongekido ku tungwe eengulu di li 6, opo di dule okutambulilwa ovanafikola ovo ve li pedu inava monenwa eenhele fiyo opapa. Ota pendula yoo ehangano laNamdeb, eshi nalo tali kendabala okuyandja omatungo opo mu dule okulongelwa ounona ngaashi la yandja etungo olo la li hali longelwa onga oshipangelo shoinamwenyo.
Nangolo ota ti nonande taku kendabalwa kufikamifwe po eengulu di li 6 , ota ti oku na omalipulo kombinga younona ovo ve li meendodo dopombada ve li pedu natango ovo ewete kutya eshi eengulu tadi ka manifwa otashi ka kala shidjuu kovalongwa, ovo va kala pedu oku ka endela pamwe novalongwa vakwao, ovo ve li nale meetundi.

“Ohandi indile kepangelo lihovele okutunga ofikola yepangelo mOranjemund, ngaashi sha tulwa nale momafaneko. Ngaashi paife ngaha out na ovanailonga ovo va kala hava longele komhina yaElizabeth  i li koLüderitz, oyo yapata novanailonga ova tumwa ve uye va longele komina yaNamdeb  kOranjemund, ovanilonga ovo ove uya nomaludalo avo, onghene ounona mofikola oyo i li po paife itava wana mo nonande taku ningwa eenghendabala dokuweda po eengulu di li 6.” Nangolo osho a yelifa.

Otaku hokololwa pofikola poAbrosius Hamutenya, kwa li pa ningwa omaindilo kovalongwa  ve li 300, ashike ofikola yoovene okwa li ashike tai dulu okutambula etata lovalongwa ovo va li va ninga omaindilo. Nonande omwaalu wa enda tau shuna pedu, eshi ehangano laNamdeb la yandja omatungo amwe mu longelwe ofikola.  Nangolo ota tumbula kutya,fiyo oshivike oshitivali shaFebuluali ope na ounona ve li pedu va teelela eengulu da wedwa po dimanifwe okutungwa.
 


Tuulikki Abraham
2019-02-15 14:48:42 5 months ago

Be the first to post a comment...