• November 15th, 2019
Login / Register

Nghene va faneka okudana oshivilo shaChristmas



■  Tuulikki Abraham

Lüderitz – Efimbo eli olo efimbo ovanhu tave lilongekida okudana oshivilo shedalo lOmukulili. Ovanhu vamwe ottava i momalweendo, okudja keenhele doilonga oko hava ningi epanga, va yuka komikunda oko va yambukile, va ka tyapule pamwe novakwapata vavo oshivilo shaChristmas.


Ovo nda popya navo moLüderitz,  vamwe ova manga nale nokuli va yuka kedu loimhungu, koumbangalanhu woshilongo opo va ka tyapule pamwe novakwanedimo vavo oshivilo shaChristmas, omanga vamwe nonande va li ve na ehalo loku ya momalweendo, va ka tyapule pamwe novakwanedimo ottava ti itava dulu okuya omolwa oilonga, onghene ovatokola okutyapula oshivilo shaChristmas, moLüderitz.


Justina Nekongo oku li omunambelewa mouMinisteli wEhongo moLüderitz, ota tumbula kutya yee okwa manga nale nokwa finda molweendo opo a ka dane oshivilo shaChristmas pamwe novakwanedimo laye koumbangalanhu woshilongo. “ Ame ohandi i ndi ka dane oshivilo shaChristmas pamwe novaneumbo oshoyo ovanamukunda. Tate oye mwene womukunda wetu Uukulamba moshitopolwa shaMusati, okwa ufana ovanamukunda vaye ve uye va tyapule oshivilo eshi meumbo laye. Ame oshiveli shomeumbo, ohandi i tu ka longekide oshivilo, nokukayakula ovaenda.” Nekongo osho a tumbula.


Fenni  Paulus oku li omuhondji modoolopa yaLüderitz, yee mwene okwa yambukile komukunda Onangwe mOndobe moshitukulwa Ohangwena, ota tumbula kutya yee okwa li  ena omafaneko aye a ka dane oshivilo shaChristmas pamwe novakwanedimo laye ashike ita dulu vali okuya, omolwa oilonga.


“Onda li ndi shi ngeno osho ondi li nale mondjila ndi ka dane oshivilo nda yuka kOnangwe, ndele mboli aaye itandi dulu vali okuya, shaashi ondi na oilonga ihapu, ovanhu vahapu ova etela nge oiyata yavo ndi va hondjele oikutu yavo yoChristmas. Ovanhu ova hala okuya moChristmas tava monika nawa vadjala eenguwo da nhuka po, ondi wete kutya itandi dulu okuya.


 Paife ohatu dana ngaa nee oshivilo eshi moLüderitz, otwa faneka, tu ka yofe ombelela kefuta, fyee hatu ka kala, ngaa nee hatu dana omeva efuta komunghulofuta, oko hakukala omalihafifo kamana, pefimbo loivilo ngaashi ei.” Feni osho a tumbula.


Kakele kaavo ve li momalongekido oshivilo shaChristmas, vamwe ova tyapula nale oshivilo shokuyele shaChristmas ngaashi Mayor wodoolopa yaLüderitz Hilaria Mukapuli okwa ningila nale ovakulupe va konda po400 oshivilo shokuyele mEtivali loshivike eshi.  


 Ovakulupe ova li va ongala mosaala yaBenguela omutenya wEtivali omo va li va yalelwa oipundi, nokutopolelwa eendja tadi tokola elaka.


Ovakulupe ovo va li va ongala ova topolelwa tete oubaki ve na oikulya, ngaashi eesilae, eeshi neexuxwa da kangwa, nounamunate naashi va mana okulya, ova havalekwa oikuki voo tava pewa keshe umwe oplastika yaye ya longelwa nawa, mu na omaludi oikulya oyo omukulupe teli telekela ye emwene neefewa dokulikosha nado omo dili moplastika oyo tuu oyo. Oplastika oyo, oi na oinima yongushu N$400.00, nomukulupe keshe okwa ya keumbo noplasika oyo , nokapakete keeshi domince keekilograma 7,2.


Mukapuli okwa tumbula kutya, eli olo efimbo loku uya pamwe, nokutyapula pamwe. Ta fatululile ovakulupe kutya oimaliwa oyo yalongifwa mokulongekida eendja, dovakulupe inai dja nande moshikefa shelelo lodoolopa, ndele oshimaliwa shayandjwa komahangano, oshoyo kovanageshefa vomomodoolopa. Eshi osha dula okuningwa omolwa oilyo yelelo loshikefa sha Mayor, oyo yakonga omakwafo komahangano, oshoyo kovanangeshefa oohandimwe.


Staff Reporter
2018-12-21 09:12:00 10 months ago

Be the first to post a comment...

You might also like...