• July 9th, 2020
Login / Register

Nikanor a mona opoosa ompe


WINDHOEK- Presidente Hage Geingob okwa ulika ngoka a li omupeviminista gwoonakulwa aakulu Hilma Nikanor onga omugandjimayele gowina kuye  kiinima yi na sha noonakulwa aakulu oshiwike shika. Nikanor okwa lombwelwa kutya ewuliko lye lyopoosa ndjika yowina otali tameke nduno molyotango lyomweedhi nguka sigo omuMaalitsa gwomumvo tagu ya, nota futwa okapandi ka fa naanaa hoka a li ta mono sho a li omupeviminista noshowo uuwanawa awuhe mboka a li ta mono pethimbo ndyoka. Momushangwa ngoka gwa shainwa kuGeingob, okwa hokololwa kutya Nikanor ota ka kala naanaa ta lopota komupevipresident Nangolo Mbumba ngaashi shi li po pakotampango nopamulandu gwompango yiilonga yepangelo. “Oto kala nduno ho gandja omayele kiinima ya guma noyapamba koonakulwa aakulu komupresidente, noshowo komisindalandu ndhoka tadhi talululwa nenge tadhi ndulukwa muuwanawa nenge dha pamba koonakulwa aakulu moshilongo,” osho Geingob a lombwele ngoka a pe opoosa ompe. Nikanor  oku li gumwe gwomwaamboka ya li ya umbile mo oshifanduke konima sho olutu ndoka halu ungaunga nomahogololo lwa kutha ko oonguka kutya hamuntu ta thikama momahogololo gwopamutumba gwopashigwana omanga e na nale oompito dhilwe dhiilonga ta futwa mepangelo. Shoka osha tumbulwa koECN oshi li oshitopolwa shekotampango lyolutu ndoka. Swapo okwa li ena aantu ye li mboka ya gumwa kokatendo hoka naNikanor okwa li gumwe gwomuyo.


Loide Jason
2019-11-07 08:03:03 8 months ago

Be the first to post a comment...