• June 17th, 2019
Login / Register

Omahooli gwomoAngola taga teyagula po oongeshefa



Victoria Kaapanda 

OSHAKATI-Omahooli taga landwa moAngola shaa li paveta otaga hanagula po nokushunitha monima oongeshefa dhomahooli ndhoka dhi na oombaapila dhokulanditha, omupeviminista gwiikwamina noonkondo dholusheni Kornelia Shilunga okwa ti ngaka oshiwike sha zi ko mOshitopolwa shaShana.


Shilunga sho kwa li ta gandja omawuyelele kombinga yomahooli taga landwa poshilongo shopuushiinda Angol kasha li paveta okwa ti omahooli ngoka inaga dhindwa,  go ohaga pungulwa momandoloma ga nika oshiponga notaga   kakeke ewangandjo nokulandithwa mouikalo inagu uka ngele tashi ya kuundjolowelele womuntu.


“Aanangeshefa mboka ye na oombapila dhokulanditha omahooli moNamibia otaya nyenyeta kutya oongeshefa dhawo otadhi shunithwa monima kwaamboka kaye na oombapila okulanda nokukulanditha omahooli okuza  moAngola shoka tashi etitha oongeshefa dhawo dhi pate nokukanithitha aakwashigwana mboka ya kutwa iilonga”. Shilunga aati ngaaka.


Ta gwedhapo ta ti omahooli ngoka inaga dhindwa, inaga yogoka, sho osho ye ga ningila ombiliha.
Shilunga ta ti ngeno kashi shi uupyakadhi okulanda omahooli okuza moAngola ngashi Namibia ha landa omahooli 60% okuza moSouth Afrika omanga 40% okuza kiilongo yilwe yi ili, ashike Angola ina hala okuyalulilwa omahooli gawo pondando y ithike pamwe niilongo iikwawo muAfrika.


“Okulanditha omahooli hoka unene taku holoka monooli otaku teyapo oshigwana, oshoka uunona wumwe owa thigapo oosikola oku ka landitha omahooli, oshoka oya landula oshimaliwa shomeendelelo”.  Shilunga ta ti.


Shilunga ta ti iilongo ayihe yaAfrika oya tula po etsokumwe kutya mo2030 oya hala iilongo ayihe yi kale yi na omahooli ga yela.
Nonando aakwashigwana ya kala nokupula omapulapulo ngele ya shulithapo okulanda omahooli okuza moAngola oshoka otaya kongo uuhupilo, notaya mono ngiini kutya omahooli ngoka taya landa oshi li paveta nenge hasho.


Uuministeli wiikwamina noonkondo dhomalusheno owa li wa yamukula kutya oshilongo kehe oshi na oompango nomalandulathano ngono ge na okulandulwa kukehe gumwe, kutya omahooli gomoAngola oga adha pondondo ndjoka ya pitikwa kuNamibia.
Ta gwedhapo kutya kape na omuntu a pitikilwa a pungule omahooli ge vulithe poolita 200 moondolopa nenge oolita dhi vulithe 600 kondje yoondolopa ke na oompbapila yokulanditha omahooli.


Shilunga okwa li a yelitha kutya omahala gamwe miitopolwa yaHangwena oga pata oshoka oya kanitha aalandi yomahooli gawo, oshoka ohaya landa koondando dhopevi kwaamboka taya landitha kasha li paveta.
Ta kumagidha ta ti aakwashigwananaya tseye kutya okulanda omahooli okuza moAngola inashi pitikwa kekotampango lyaNambia, osha puka.


Aakwashigwana naya longele kumwe okulwitha uupyakadhi mboka wa holoka oku wu sinda opo ya iyande komawupyakadhi tage ke ya monakuyiwa ,notaga vulu okuholokithwa ngaashi naana kokulanditha omahooli inashi pitikwa moshilongo. 


Staff Reporter
2018-12-14 15:14:43 6 months ago

Be the first to post a comment...