• August 25th, 2019
Login / Register

Omaudhano meni lyoshilongo



Uukwangula - Okapale kIita yaKadha Olyomakaya ga za ko oka li ku udha ka fa ofenya, sho aaholi yokatanga kokoompadhi ya za koombinga noombinga ya li ye ya okutala yimwe yomoondjumbeta yokatanga kokoompadhi moNamibia Mohammed Ouseb nooyakwawo yalwe sho taya nyanda okatanga.

Gwonale ina puka sho a popile kutya ontelekulula iha yi dhogeke omuhoka, nonando oyendji oya li ye ya netumwambwile oku tala nkene enyakwa ndika ta li nyanda okatanga shika ina shiningwa oshoka omunamimvo 45 ota ulike kutya oomvula dho ku ngongolitha okatanga odhi li dhe mu fadhuka po onkene etanga oli li lye mu ningila edhigu, na ina ninga po lela sha shomupondo tashi hokitha aatali.

Nando omwaalu gwaatali ya li ya holoka pokaple ogwa li gwaayambidhidhi yoNorthern Legends Mohammed okwa li pewa esimaneko kehe ethimbo a li a pewa etanga moka aayambidhidhi ya li noku igidha edhina lye muule , shoka tashi ulike kutya edhina lye olya vuka mokati kaaholi yomawudhano moNamibia.

Mohammed okwa li a tameke konima kompadhi nanana hoka a kala ha dhana pethimbo a li omunyanya magulu ashike molwa uukokele okwa li a lundulukile meni lyokapale moka a kala owala ta ende oshoka ita vulu we oku tanga uukwanambwiyu ngaashi shito.

Tsumeb Legends ndjoka ya li ta yi dhanenwa kuMohammed oya li ya pewa ootundi komakanda gwokonooli Northern Legends, moka ya li ya pondola oku tula mo ookoola 4-2 pokahiya kahugunina.
Mohammed okwa li a thigipo okapale konyala oominute 15 omanga uudhano ina wuthika pehuulilo, na aayambidhidhi oyendji oya li ya mbomboloka opo ya kuthe omafano naye.

Osipana yokatanga kokoompadhi yopashigwana:
Uuministeli womawudhano oshiwike shika owa li wa gandja oombetsa mbali oonene nokambetsa kamwe oku thindikila aayambidhidhi yosipana yopashigwana kuudhano wasimana mboka ta wu ka kutha omapu moongongo oku tala kutya olye ta vulu oku ya kekopi lyiigwana yaAfrica.

Omupevinashipundi gwo Brave Warriors Supporters Club Wambu Moses okwa li a koleke omapopyo ngaka na ota indile kehe ngoka a hala a ka yambidhidhe osipana hwiya koZambia opo ya ninge ekwatathano neembonge dhokomissi yomawudhano moNamibia yo ya yaleke omahala gawo.

“Aayambidhidhi mboka ta ya ka londela moWindhoek ota ya pulwa opo ya fute N$ 700, Oshakati N$ 500, Rundu 400, omanga mboka taya pitulwa moKatima Mulilo ta ya ka pulwa opo ya gandje okashona ko N$ 350, na esiku lyahugunina lyokufuta iimaliwa mbika onena,” Moses tati.

Iimaliwa mbika ota yi ka longithwa oku futa aahingi yoombetsa dhika, no ku nwetha oombetsa meni lyaZambia, oshoka epangelo ota li ka nwetha owala oombetsa dhika uuna dhili meni lyoongamba dhaNamibia.
Uudhano pokati ka Zambia na Namibia ota wu kalako olyomakaya gwomasiku 23 gwomweedhi nguka.

Etanga lyokomake (Volleyball):
Omumvo gwetanga lyokomake monooli ogwa li gwa tameke ehuliloshiwike lya zako, Six Stars okwa li a hanagula po oosipana onkwawo nomadhengo ganyanyaleka, muudhano wotango okwa li a pe Ongwediva Medi park 3-0, na okwa li a pe Nakapele 3-0 muudhano we wa hugunina.

Muudhano woontana dha nelende, Oshana Nampol osha li sha dhenge mo Nakapele 3-2, ye Six Star ta ningi lyoshilalo olyo ha li lika komakwawo no ku dhenga ishewe Nakapale 3-1, Uudhano mbuka owa li wa dhanenwa pOndangwa Tennis Court.


Shipi Elago
2019-03-08 15:16:52 5 months ago

Be the first to post a comment...