• September 24th, 2019
Login / Register

Ombili na yi pangele- Presidente Geingob



WINDHOEK- Omupresidente Hage Geingob ohela okwa li a pula Aanamibia ya gamene emanguluko ndyoka lya li lye ya nuudhigu pamukalo goku yanda noku ekelahi omipopyo adhihe dha nika uutondwe, uukwamuhoko osho wo kehe shoka tashi ulike okatongotongo ta ka kunu omapumomumwe. Geingob okwa li a popi ndhika pethimbo lyoshituthidhimbulutho shomapendafule shoka sha li mOtjiwarongo moshitopolwa shaTjozondjupa. 26 Aguste esiku ndyoka omakoma goPeople’s Liberation Army of Namibia (PLAN) ga li ga patulula omundilo oku ikutha muupika wepangelo lyokatongotongo lyaSouth Africa. Esiku ndika ohali tyapulwa nokudhimbulukiwa omumvo kehe opo itaatu dhimbwa iilonga mbyoka ya longwa kwaamboka ye tu etela emanguluko. Nuumvo, mokati kaamboka ya li ya thiki poshitithi ongaashi aakulupresidente Sam Nujoma naHifikepunye Pohamba.

“Namibia oshilongo shetu, osho ashike oshilongo tu neni okugamena opo mboka taye ke ya yakale mo, otu na okukwashilipaleka kutya Namibia itatu mu ekelehi oshoka osho omagano twa pewa kuKalunga, omagano ngoka ga kondjelwa nokusilwa kaantu omayovi nomayovi,” Geingob ta dhenge omuthindo.
Oshi li momake getu okukutha iikaha yetu ee tatu longeni nomusindalandu gwedhiminathanepo, tu poleke iilalo mbyoka ya zi nale pethimbo elulu lyekondjelomanguluko osho wo oku ukitha oshilongo mondjila ya yela nawa,” Ta gwedha ko.

Ta ti epangelo otali ka tsikila okuhwahwameka Aanambia ya kale yi ihole, ya taalele onakuyiwa pamwe yi manga uukuni kumwe opo oshilongo shi kale oshiwananwa nonakuyiwa yi na ombili.
“Ngaashi handi shi popi olundji, iilongo oha yi yi kiita uuna oonkundathana dha ndopa. Mokupopya otu na aluhe okukutha mo uuwananwa, ondi na okwiitaala kutya sha landula iigongi yandje miitopolwa ayihe 14 yomoshilongo, ombepo yuukumwe otayi pangele moshigwana,” Ta ti ngaaka.

“Otandi pendula Aanambia yoondondo noonkatu dha yooloka , sho ya kutha ombinga pamukalo omwaanawa nokutaambathana ko. Nonando pe na omaiyuvo ga yooloka, otwa manga uukuni kumwe opo tu itaale esindano lyetu, tu palamene omashongo getu nokuhila tu ukitha kombinga yimwe tatu konggo onakuyiwa ohwepo,” Ta ti ngaaka.

Geingbo ta ti esiku lyomapendafule kali shi ashike esiku lyokudhimbulukwa mboka ya pita po.
“Esiku wo lyokudhimbulukwa uuwanawa mboka wa thigwa po komapenda gaakiintu naalumentu,” ta ti.
Ta ti omukokolipresidente, Sam Nujoma okwa tile, “Omukumo nomatokolo oge na okuhwahwameka gAanambia mboka ye na elago okumona esiku lyemanguluko osho wo aanyasha yokomongula, ya tunge Namibia omuhwepo, moka aantu ayehe ye na ompito okumona uuwanawa.”

Geingob ta ti uupenda mbuka otawu tsikile okukumika oyendji sho tapu tungwa Namibia lyaayehe, lya hangana nota li yi komeheo.

Geingob ta ti Aanambia naya tale iiholelwa iiwanwa ngaashi yaNehale lyaMpingana, Mandume yaNdemufayo, Iipumbu yaTshilongo, Hompa Nyangana waMukuve, Hompa Kandjimi Hawanga, Brendon Simbwaye naMama Kakurukaze Mungunda.

“Otatu dhimbulukwa omalugodhi moka Aanamibia ya sila, ngaashi koHornkranz, olugodhi koHamakari, Namutoni, Lishora nokoKamenga. Otatu dhimbulukwa wo mboka ya kanitha oomwenyo dhawo koOld Location.” Geingob ta ti


Kuzeeko Tjitemisa
2019-08-27 07:51:56 28 days ago

Be the first to post a comment...