• May 31st, 2020
Login / Register

Oongudhi dhomamanya goombila dha yakwa ko


Victoria Kaapanda

ONGWEDIVA - Oongudhi dhomamanya goombila dhongeleka Oshakati Elcin odha yakwa ko Osoondaha ya zi ko molukanda Oshikango mOshakati yokuuninginino.

Omusita gOngeleka yaShakati Erasmus Nengongo okwa lombwele Kundana ta ti oongudhi dhomamanya goonakusa dhi dha yakwa ko odhindji lela.

“Nonande oongudhi dhimwe odha monika, odha adhika dha fumvikwa kohi yevi nodhi li miikaha yopolisi oshoka tse katu na ehala lya gwana oku dhi pungula. Oshidhigu nduno okudhimbulula kutya ndjika oyo yinipo oshoka odha faathana,” Nengongo ta ti ngaaka. Nengongo okwa ti onkundana ndjoka sho kwa li e yi tseyithilwa osha li she mu halutha. Oshikumithi okuyaka omamanya goombila dhoonakusa, oomamanya oge na ondilo okutula kombila, po kape na ngu a hala ombila yomukwanezimo gwe tayi monika nayi. Cornelia Thobias ngoka a li a tseyithilwa kutya oongudhi dhemanya lyeyendo lyayina nadho odha li dha yakwa ko, okwa ti onkundana ndjoka oye mu uvitha nayi. 

“Shino hasho oshikando shotango andi uvu omayendo ga yakwa, ethimbo limwe oto uvu iiketha yoonakusa ya yakwa mo mombila. Oshihwepo ngele omayendo taga tungilwa ongandjo nomweelo tagu kala hagu patwa kehe ethimbo nenge pukongelwe omukeeleli,” Thobias ta ti ngaaka.

Ta popi neyeme ta ti oya longitha iimaliwa oyindji okutula ko emanya lyayina, naashi lya yonagulwa po kuwalye. Ta hokolola kutya ke shi wete ngele aafuthi otaya vulu okuyaka oongudhi dhomamanya, otaye dhi fala peni? Napu talike nawa pomahangano ngoka haga landitha omamanya goombila.
Omugandjimulombo nomugandji gomawuyelele gwopolisi moshitopolwa shaShana Ispekta Thomas Aiyambo okwa ti oshiningwanima shoka osha li sha lopotwa Osoondaha ya zi ko potundi 16h00 yomutenya.

“Oongudhi dhomamanya dhomayendo goombila dhi li 39 odha li dha ndhindhilikwa dha yakwa ko, omanga dhi li hamano, niikwatelithi yomathano yi li ihamano ya li ya adhika ya fumbikwa kohi yevi  oshinano oshishona okuza pomayendo,” Aiyambo ta ti ngaaka.
Ta hokolola ta ti sho ya li ya ningi omakonaakono komayendo esiku ndyoka, oshiningwanima otashi ulike opo sha ningwa.

Ta ti oya li ya dhidhilike kutya hasho kwa li oshikando shotango, omayendo oga kala nokuyakwa ihe ihashi dhimbululwa.
Sigo onena kape na omufekelwa a kwatwa moshiningwanima shika, ashike omakonaakono gopolisi oge li metifa.
 


Staff Reporter
2019-10-29 08:01:08 7 months ago

Be the first to post a comment...