• November 17th, 2019
Login / Register

Tava deulwa okufaneka



Lüderitz  –  Ounona ovo ve li meeprima-fikola moLüderitz, ovo ve na ounghulungu wokufaneka, ove li va kufa ombinga momadeulo okuwedela ko kounghulungu oo ve na wokufaneka. Omulongifikola keifano, omunamido 27 Christeline Motinga, oha yandje omadeulo okufaneka kounona va fika pomuwoi ovo ve linyolifa fiyo opapa.

Omadeulo ohaa kala mouministeli wovanyasha moLüderitz, Olomakaya keshe okuhovela potundi 13h00-15h00, nomOsoondaha, konima yomambo okuhovela potundi 15h00 -17h00. Motinga oo e na ounghulungu wokufaneka ota ti fiyo opapa ounona ashike vomeeprimafikola ve linyolifa, ota ti omhito oya yeulukila yoo ounona aveshe, naava ve li keesekondele dopedu neesekondele dopombada, modoolopa.

Omadeulo okwa hovelele odula ya dja ko. Olomakaya la ya, ounona ovo hava mono omadeulo, okufaneka, ova li va ya novakulunhu vavo, va ka tale nghene ovana tava longifa  ounghulungu oo va likola wokufaneka.

Ovadali ovo va li va holoka, ova li va hafa shili, mokutala ovana nghene tava ulike tava painda, omafano, taa monika nawa. Omudeuli wavo Motinga, okwa tumbula kutya okwa longekida efiku eli onhomenawina, opo ounona va ulike eshi va likola, nelalakano yoo okutwa omukumo ovadali, ve litule mo mokufutila ovana, voo va twikile noku tuma ovana, va kale nokuya komadeulo. Motinga okwa ti eshi osha ningwa yoo opo ovanafikola va kale va longa po sha shi shambula omanga inava ya mefudo.

“Omadeulo aa nande ohaa ningwa, mehuliloshivike, ame ondi li omulongifikola, nounona, ovo have uya komadeulo ove li ovanafikola, onghene atushe ohatu i manga mefudo naohatu ke uya ashike tu hovele vali nomadeulo etu, pefimbo ofikola tai ka hovela,” Motinga osho a tumbula.


Tuulikki Abraham
2019-04-18 10:51:04 6 months ago

Be the first to post a comment...

You might also like...