• December 8th, 2019
Login / Register

Uupale woondhila owu li monkalo ombwaanawa - Katoma



WINDHOEK-Okangundu komutumba gwopashigwana hoka ke lile po iinima yopondje noshowo egameno oka li ka tokola opo ka ka ninge omapekaapeko guupale woondhila  miitopolwa itatu yoshilongo , Omaheke, Hardap noshowo //Kharas oya hokolola kutya egameno kuupale hoka oli li nawa lela.

Omusimanekwa Leevi Katoma, ngoka oye a li a kwatela osheendo komeho okwa hokolola kutya uupale auhe mboka owu li monkalo ombwaanawa nokapale kOranjemund okawanawa lela.
Ndhika Katoma okwe dhi popi oshiwike sha zi ko momutumba gwopashigwana moWindhoek omanga a li ta gandja omulombo nkene sha ende sho okangundu hoka ka yi metalelopo ndyoka.

Katoma okwa hokolola kutya okwaakwatathana pokati koNamibia Civil Aviation Authority(Airspace control), Namibia Airport Company, Opolisi yaNamibia, Uuministeli wiinima yomagumbo noshowo uuministeli wiimaliwa yi na nasha nokunambela noshowo okutuka koondhila oshi li sha nika oshiponga kegameno lyuupale notashi limbilike.

“Oshikwawo ooshoka kutya okushonopala kwaanambelewa yopolisi noshowo aanambelewa yomuunisteli wiinima yomegumbo kuupale woondhila hoka oshi li woo elimbiliko enene,” osho omutse gwokangundo hoka a hokolola ngaaka.

Katoma okwa hokolola woo kutya aanambelwa mboka ya li ye li mosheendo moka okwa li ya tseyithilwa kutya uupale mboka ow ali wa tungwa koGobabis Aerodrome kaantu yopaumwene kaaye na etsokumwe nokontalaka nuumisteli wiilonga niiyenditho.

“Natu dhimbulukweni kutya Gobabis Aerodrome kasha shi oshinima shopaumwene ihe oshinima shepangelo. Onkene  napu kale pu na omakwatathano nomatsokumwe pokati kepangelo naantu mboka. Onda inekela minista gwiilonga niiyenditho ota vulu okugandja uuyelele wa gwana mwaashika,” osho a hokolola ngaaka.
Ashike Katoma okwa hokolola kutya okangundu haka oke li woo momalimbililo oshoka okapale koKeetmanshop ihaka longithwa naanaa onkene  otaya indile kutya mboka yomoshitopolwa moka naya tule mo omukumo mokukala ya sa oshimpwiyu okukala ka longithwa.

 Okwa ti okangundu oko tuu hoka, oka li ka tseyithilwa kutya  opu na woo omashongo ga taalela okapale kOranjemund unene tuu gwokoopaleka oondhila noombautu pokapale noshowo komunkulofuta gwaNamibia.
“Shika oshi li oshinima oshinene  na onkene ope na okuningwa sha meendelelo unene ngaa oominista ndhoka dhi lile po iikondo mbyoka tayi ungaunga nomashongo ngaka oya pumbwa okutya ko sha opo omashongo ngaka ga kandulwe po,” Osho a popi ngaaka momutumba gwopashigwana oshiwike sha zi ko.

Okwa ti kutya kokapale kaOranjemund oku na woo omashongo ngaashi kaku na aakondololi yombepo ya gwana niifendela yokunambela ihayi gongelwa kokapale hoka.


Loide Jason
2019-06-28 12:41:17 5 months ago

Be the first to post a comment...

You might also like...