Paulina Ndalikokule
ONGWEDIVA – Omundohotola gwuunamiti kokapangelo Milla Medical Clinic kOshikuku okwa ti oku kala niitalaleki moshikondo shuuhaku kashishi efuu lyowala ashike oshinima shapumbiwa noonkondo.
Dr. Joseph Namila okwa popi dhoka poshituthi shembuluko lyomashina gokutalaleka sha ningilwa moValombola Vocational Training Center mOngwediva mEtitatu.
Namila okwa ti miipakete nomomashina goku talaleka ohamu tulwa iikunguluki nenge uupambu wontumba wakuthwa aamvu miipangelo wuka ningilwe omakonaakono. Ohamu endithwa noku pungulwa wo omiti noowenda dhoka dha pumbwa oku kala dhapungulwa muutala opo kaadhi ninge nayi.
“Esimano lyoofiliza miipangeo itali pu kupopiwa, omolwa oofiliza tuna omiti tadhi vulu okulonga nawa, ombizi inayiota nenge iitopolwa yolutu yili nawa mboka hayi pewa aavu momatando, okupungula omiti, naanuvu yena iikulya osho wo okukutika omidhimba opo aantu ya vule oku pewa ethimbo lyagwana oku longekitha omaso omudhimba inagu ninga nai ayihe mbika uuwanawa woofiliza,” a ti ngaaka
Ta ti aantu naya simaneke noku tseya nkene oofiliza hadhi kwathele muundjolowele muuyuni ndele kadhi li owala oshilongithoma shomegumbo.
Minister gwiipindi nomahumokomeho Lucia Iipumbu moshipopiwa sha lesha pehala lye kukansela gwaNgwediva Andreas Utoni okwa ti esiku ndyoka ota li dhimbulukwa opo aantu ya tseye esimano lyuutekinolohi moofiliza.
“Oofiliza odha simana oshoka ohadhi kale ke po iikulya yetu, omiti manga omipepo hadhi ningi oonkalamwenyo dhetu oompu unene tuu ngele uuna onkalo yombepo yashendja,” a ti ngaaka.
Ta ti omahangano genasha noofiliza, omipepo dhokutalaleka osho oku gandja uupyu ngaashi Association of Heat, Ventilation, and Cooling of Namibia, SADC Refrigeration and Air Condition (RAC) Association melongelo kumwe noNational Ozone Unit ogena oshinakugwanithwa oku kwashilipaleka kutya aantu oya tseya nkene iinima mbika hayi longo.
Iipumbu okwa tsu omukumo mboka haya pangele oofiliza osho wo omavayela ya kwashilipaleke kutya oya mona omadheulo noyena oozapo nomikandapitiko.
“Osha simana opo ayehe mboka haya tula mo nenge haya pangele oofiliza nomashina ngoka ya kale yadhewulwa opo kuyandwe iiponga,” a ti ngaaka.
Omukuluntu gwehangano lyoAssociation of Heat, Ventilation, and Cooling of Namibia Parastus Nepolo okwa ti aantu naya kale uupathi uuna taya longitha oofiliza nomashina guutalala nuupyu.
“Iinima mbika oya pumbwa omuntu eyi uviteko oshoka ngele inayi tulwa mo nawa nenge yipangelwe nawa ota yi vulu oku ndwafuka omulilo omunene tagu fike,” a ti ngaaka.
Esiku ndika oha li dhimbulukiwa kehe omuvo, otema yomvula ndjika ‘Ondjele yuupyu nuutala oyi na oshilonga’.