Charles Ndeumane

Ompangulilo yaMangestalata mOhangwena ota tindile omulumentu gwomimvo 20 ompito yeifutilemo sho anuwa a kwata koonkondo uutekulu we uyali - okamati nokakadhona - okanona kopuushiinda, noshowo iikombo yaandjawo.

Omulumentu gwomimvo 20 gwomomukunda Onamhinda moshitopolwa shaHangwena anuwa okwa tulwa miipandeko momasiku 25 Mei molwa iilonga mbika yomilaulu a kala noku yi ifola iikando ya yooloka. 

Ofamili yaanona mbaka oshowo aashiinda otaya ti polisi nando oya kala noku lopotelwa iilonga yomulumentu nguka monakuziwa, oyali owala ya patulula iipotha, ashike kali a mangwa po, sigo esiku lyoshiningwanima shoka sha huguninwa. 

Opolisi moshitopolwa shaHangwena oya tindi oku tyako sha koshiningwanima shika, molwaasho anuwa omupopiliko gwopolisi moshitopolwa moka Warrant Andreas Nghiyolwa okwa ninga oomwedhi ndatu keemo mombelewa.

Iilonga ye yuukolokoshi anuwa oye ya puuyelele sho ishewa a kwata koonkondo okamonakadhona kamumwayina koomvula 10, hoka ka adhikilila kuyina taka lili. 

“Okwa li twa zamo megumbo, uunona tatu wu thigi mo ta wu dhana, ngaa ngaashi shito. Hekulu naye omo twe mu thigi, eli mondunda ye yokulala. Sho nda galuka onda adha okanona hoka kokakadhona ta ka lili ashike kaka li taka popi kutya oshike. Okamwayina kokamati koomvula hetatu, oko ka lombwelendje konima yethimbo kutya mumwayina okwa kwatwa koonkondo kuhekulu. Sho nde ka konaakona ngame mwene onda mono kutya oshoshili shoka tashi popiwa, oshoka onda adha okapendi kako katuta, ashike natango omakonakono gandohotola oga ningwa, noku holola kutya okanona oka kwatwa koonkondo,” osho yina yoonakuninga iihakanwa a ti. 

Ta ti sho a pula pula okanona ke kokamati oke mu lombwele ishewe kutya shoka hasho oshikando shotango okakadhona ta kwatwa koonkondo ku hekulu ngoka. Okamati oka lombwele wo yina kutya nako oka kwatelwe koonkondo ku hekulu oye tuu ngoka.

Sho aanona ya pulwa nawa, oya lombwele wo aakuluntu kutya hekulu oye tuu ngoka okwa kwata ishewe koonkondo okanona kokadhona kopuushiinda nako kethike puyo. Omulumentu nguka anuwa oha tegelelele aashiinda yaze mo megumbo moka haka ponokela okanona ngele ka thigwa mo oko akeke. 

“Okwa kala wo ha kwata iikombo yaandjawo koonkondo, ashike shoka kapu na ngoka eshi landula nomukumo oshoka okwe shi ipatana, ashike uunona owa ti owe mu mona ta lala iikombo,” osho mushiinda gumwe a gwedha po.

Omulumentu nguka anuwa okwa adhika nale a patululilwa oshipotha shekwatokoonkondo lyaanona mbaka ashike opolisi kaya li ye mu kwata po. 

“Anuwa okwa kala he wu kwata koonkondo, sho oshinima shoka osha kala ngaa shi lopotwa kaakuluntu, sigo nee oshikando shika sho a mangwa momasiku 25 Mei 2024,” omushiinda omukwao ta hokolola. 

Sha ikolelela kaakwanezimo, omufekelwa okwa holokele komeho yomompangu muMei nokwali a tindilwa eifulilomo. 

–mrndeumaneraycharles@gmail.com