Paulina Ndalikokule
ONAMHINDA – Aavali oyendji otaya nana nonkatu okufuta elongo lyaanona yawo kiiputudhilo yopombanda, unene tuu mboka ya ndopa nenge inaya mona elago lyokufutilwa kepangelo.
Lucia Hamalwa gwomomukunda Onamhinda oku li gumwe gwomaavali mboka ihaya longo nohaya hupu owala mokulanditha ombike, iikuni nomahuku okupalutha oyana naatekulu, ye miimaliwa mbyoka omo wo ha futile onkelo ye osikola.
Hamalwa ota ti osha li enyanyu enene megumbo lyawo sho omwanamwati Nestor Haukongo a piti ondondo 12 mo2020. Haukongo oye gwotango moyana yane ta piti ondondo 12. Ta ti okwa kambadhala okugongela kehe okasenda a longekidhe omona a ye koshiputudhilo shaalongi shaUnam mOngwediva.
Ashike mokulanditha ombike, iikuni osho wo omahuku okwa mono mo owala N$1 500, sho a nyengwa okugawanitha oshimaliwa shokwiishangitha okwa tokola a landithe po okatana ke oko akeke kwa li e na opo a vule okufuta iimaliwa yokwiishangitha nokulongekidha olukalwa lwaHaukongo.
Elago enene omona okwa ka mona eyamukulo lyomukuli gwokwiilongitha ko-NSFAF.
Hamalwa ota hokolola nomahodhi kutya Haukongo sho a yi kOngwediva okwa kanitha eitulemo mosikola sho a mono enwethemo lyookuume aawinayi sigo ta ndopa omvula yotango.
“Okanona hoka oka molosa (hepeka) ndje oshoka onda kala owala tandi ka nyangele, kehe okamaliwa tandi mono otandi mu tumine owala ashike sho iizemo ye ke ya okwa ndopa,” a ti ngaaka.
Omolwendopo, Hamalwa okwali e na oku futa oN$21 000 tayi zi mondja to ye, yiilongwa mbyoka Haukongo a ndopa, oshoka NSFAF komalimba ge oha pata ko ngele omuntu a ndopa.
“Ofamili oya gwedhele ndje po N$6 000, onda tokola ishewe okuya kumwene gomukunda opo a pitike ndje ndi landithe po ombinga yenkolo lyandje opo ndi fute iimaliwa mbyoka oshoka onda adhika nda pwa po nale,” Hamalwa ta ti.
Ta gwedha po kutya omwana oku na omagano sho osho a li a tokola okuninga kehe shoka ta vulu opo a mane eilongo.
Kakele kokulanditha po evi lye omukiintu nguka nofamili ye oya thiminikwa konkalo opo ya kale taya teke momatale omeya gawo gomegumbo oga patwa konima sho inaya pondola okufuta oshimaliwa shi vule poN$3 000 okuza mo2021.
“Ngashiingeyi ohatu nu ashike momatale oshoka iimaliwa kayi po yokufuta omeya, muni okwe ga teta ko,” Hamalwa ta ti.
Elago enene, onkelo yaHamalwa oyi itedhulula, ya lundulula onkalamwenyo nokwiitula mo melongo.
Haukongo okwa ti okwa li a kwatwa komanwethwe mo ga puka sho a yi kosikola momvula yotango shoka she mu imbi i itule mo mosikola.
Ota ti konima sho a ndopa nokumona meme gwe ta laditha po evi lyawo opo a mono oluhepo lwaandjawo nokwiitula mo, ngashiingeyi oku li nokuli komvula ontitatu.
Haukongo okwa tsu omukumo aanyasha ooyakwawo ya kale nokulonga nuuudhiginini yo ya yande omanwethemo, ta ti mboka ye na uunongo wokukulula nenge woongeshefa naya tameke opo ya vule okumona iiyemo ya gwedhwa po.
“Natu kale aluhe nokutseya kutya aantu oya za komagumbo ga yooloka shoka tashi ningwa kuyakweni ngele hasho wa longwa kaandjeni ino shi ninga,” ta ti ngaaka.
Okwa tsu omukumo aavali ya dhimine po oyana ngele ya ningi omapuko, taya tsikile noku ya pa omukumo osho wo okuya yambidhidha uuna taya pumbwa,” Hamalwa a ti ngaaka.