ONGWEDIVA- Olukanda Onantsi mOndangwa ola ninga limwe lomomalukanda taa mono omauwa eshi elelo lodoolopa la andjaneka olusheno kovakalimo. 

Muni waNdangnwa natango okwe li pyakidila okuninga opate yongalama kolukanda tuu oko notai kala ya pwa diva.

Okwa diddilikwa ovakalimo vokolukanda Onantsi va kala tava mono oixuna eshi kwa li kuhe na olusheno.

Omupopiliko welelo laNdangwa Petrina Shitalangaho-Mutikisha okwa ti osha fimana ngeenge komalukanda ta ku tulwa omayakulo ngaashi olusheno, oundjuwo noshoyo nomeva. “Olusheno ola fimana molwashi otashi kwafele oshiwana mokutota po eengeshefa noshoyo okukelela eembudi momapandaanda, shaashi hadi kala mo unene ngeengge mwa dima,” ta ti. 

Okwa yelifa ta ti Onantsi paife oi na omayakulo aeshe, mwa kwatele omeva.

Shitalangaho-Mutikisha okwa ti kolukanda oko oku na omaumbo eli 564.

Natangwe Shoombe omukalimo womOnantsi okwa hokolola ta ti okwa pandula kelelo lodoolopa yavo eshi leva etela omayakulo.

“Otwa li hatu ningi oihakanwa yokunyekwa omaliko etu ngeenge hatu ende momapandaanda efimbo loufiku. Onghee paife otu li meameno molwashi otwa mona olusheno,” ta ti.

Selma Tupopila okwa ti paife ota ka tameka ongeshefa yaye yokuhondja oikutu meumbo laye molwashi paife ova mona omayakulo olusheno.

“Onda kala alushe nda hala okuninga ongeshefa yange ashike olusheno olo unene eshongo linene. Otwa pandula muni wetu waNdangwa komayakulo,” ta ti.

Omudo wa dja ko muni natango okwa li a yandjaneka omayakulo mOmashaka omo namo oshiwana kwa li sha pewa olusheno nomeva.  -fhamalwa@nepc.com.na 

Caption: Omayakulo… Olukanda Onantsi la tulwa omayakulo olusheno kumuni