ONGWEDIVA- Eshi omundohotola Helena Ndume nosheendo shaye va mana oku tanda noku twikulula ovanaudu vedulife po700 konooli yokoushilo, paife ova yuka konooli yopokati.
Edi oda kolekwa komupopiliko momuministeli wouhaku nomayakulo opanghalafano Walters Kamaya momukandapitifi wa pita Omaandaxa.
Oshikonga shepango lomesho otashi ka tameka momwedi tau ya kOhangwena, Omusati nOshikoto.
Omafiku 14-21 Juni, Ndume okwa li koshipangelo shaRundu, omo ovanhu vedulife 700 kwa li va mona omayakulo epango lomesho.
Kamaya okwa ti omundokotola noku li omukwateli komesho woshikonga shepango lomesho osho tashi ka kala koshipangelo shaNgela momafiku 12-19 Juli.
Momafiku 9 -16 Anguste Dr Ndume otava kala koshipangelo shaShikuku moshitukulwa shaMusati omanga momafiku 6-13 Septemba otava kala koshipangelo shaNandjokwe.
Oshikongo shepango lomesho osha tamekele momafiku 10 Mei koshipangelo shaGrootfontein omo ovanhu vahapu kwa li va mona omayakulo epango lomesho.
Kamaya okwa ti ouministeli wouhaku otau twikile okukala wa eta omayakulo ouhaku popepi noshiwana. “Oshikonga shepango lomesho oshi kwetelwe komesho keendokotola da yooloka da dja moNamibia noshoyo eendokotola da dja kondje yoshilongo,” ta ti.
Okwa indila oshiwana koitukulwa yokonooli opo shi longife omhito ei okukala sha ka konga omayakulo epango lomesho unene tuu ovakulupe. “Ovanasha nava findikile ovakulupe koipangelo opo va ka pangwe omesho,” ta ti.
Dr Ndume okwa ti elalakano loshikonga okukwashipaleka kutya ovanhu ova pangwa omesho nokukala ve weteko nawa opo va dule okulonga oilonga yavo noupu.
Okwa ti ovakulupe ovo unene hava holoka momwaalu muhapu okukonga ouhaku womesho.
“Ohandi udu nawa ngeenge omunhu e weteko unene tuu ovakulupe. Iha shi kala shiwa ngeenge omunhu e li mokati ka vakwao ndele ke wete ko,” Dr Ndume ta ti. Dr Ndume okwa ti nonande oku li moshipundi shopondjela okwa ti
ota twikile nokuyambidida oshiwana mokupanga omesho noshoyo
okutopolafana ounongo waye neendokotola dikwao.
Lemisia Nakomba weedula 30 noku li ta tonatele inakulu e na omesho a twika, okwa popya ta ti okwa pandula eshi omundokotola Ndume te keya konooli.
“Ei onghundana iwa molwashi paife ohandi ka twala mekulu koshipagelo a ka mone epango lomesho,” ta ti.
Okwa ti omudo wa djako pefimbo oshikonga shomesho sha li koshipangelo shaShakati inakulu okwa xupako kepango lomesho molwashi ove shi uda kwa lata.
Okwa weda po ta ti pefimbo loshikango eshi oye ta ka ninga wotete okukala a twala inakulu koshipangelo shaEngela.