Paulina Ndalikokule
ONAMHINDA - Nonando Priskilla Shimboyo a kala ta tekula nokutonatela nohole nondjungu omwanagona Tuyenikelao Tuyoleni ngoka a valwa nuulema, ota ti ohashi pula oshindji nomazigudhe okutonatela aantu ye na uulema. Shimboyo okwa kala nokusila oshimpwiyu Tuyoleni okuza nkene a thigwa po kunakusa yina sho a li owala e na oomvula hetatu, ngashiingeyi oku na oomvula 28.
Shimboyo goomvula 44, ota ti osha kala oshidhigu kuye okukonga iilonga okuza muunyasha we oshoka okwa kala nokutonatela Tuyoleni ngoka iha ende ye iha popi e li owala mombete nenge mokatemba.
Okuza oomvula adhihe ndhoka Shimboyo, Tuyoleni oshowo oyana yahetatu naatekulu yaali oya kala taya hupu moshimaliwa shoka Tuyoleni ha kwata okuza kepangelo meyambidhidho lyaantu ye na uulema. “Tuyoleni oha zala omilambo dhi na ondilo, moshimaliwa moka omo wo handi landa mo oothewa niipumbiwa ye osho wo uusila nosheelelwa shetu, unene tuu pethimbo ndika lyoshikukuta,” Shimboyo ta ti ngaaka. Ta ti okwa hala epangelo lyi yambidhidhe aasilishimpwiyu yaantu ye na uulema oshoka iha vulu wee okunyangadhala nenge okukonga iilonga oshoka ethimbo lyawo ohali pwile mokutakamitha aantu mboka. “Aantu mbaka ohaya pumbwa okuyogwa, okupewa iikulya kokana osho wo okutonatelwa ethimbo alihe, kandi na ngeno uupyakadhi okuninga iinima mbyoka, oshoka owala itandi vulu oku ka konga iilonga yilwe tayi vulu okweeta iiyemo ndi fute oosikola osho wo okukwathela aanona yandje,” a ti ngaaka.
Ta ti ota longo nuudhigu oshoka pehala mpoka haya zi kape na epya ya kuthe mo iipalutha. Ta ti onkalo oya dhigupala wo oshoka ethimbo nethimbo okwa taalela omashongo ngaashi omalundilo kutya oha li po iimaliwa yaTuyoleni, yo ishewe oya tongolwa koshigwana.
“Oluhepo, okutongolwa osho omapopyo ngoka otaga vulu okweetela omuntu uuvu wopomadhiladhilo,” ta ti ngaaka.
Epangelo ohali kwathele aakulupe naanuulema noshimaliwa N$1 600. Aakwanezimo naamboka haye ya tonatele oya ti ohaya adhikwa kuupyakadhi, itaya vulu okuthiga po aantu mbaka oku ka konga iilonga, yo oyendji ihaya futwa.