Charles Ndeumane

Minista gwuunamapya nuuniimuna, omeya nomatulululo gomavi Calle Schlettwein okwa ti uunafaalama woondjuhwa itawu eta owala iikulya moshilongo, ihe otawu eta po woo oompito dhiilonga. 

Schlattwein ndhika okwe dhi popi pethimbo a patulula pambelewa ofaalama yiikwamawawa yedhina Kadila Poultry Farm ndjoka yi li popepi nondoolopa yaKahandja moshikandjohogololo shaOtjozondjupa oshiwike shazi ko.  

Ta ti uunene wofaalama ndjoka otawu eta einekelo kutya ota yi ka ete po oompito odhindji dhiilonga opo ku shunithwe pevi omwaalu gwaantu mboka kaa ye na iilongo moshilongo. “Nena ita tu patulula ashike pambelewa ofaalama ompe yiikwamawawa, ota tu tyapula ombepo yuunangeshefa, uunkulungu noshowo oshikondo shopaumwene shoka ta shi humitha oshilongo shetu komeho,” osho Schletwein a popi ngaaka pethimbo ta tula miilonga ofaalama ndjoka.

Schletwein okwa ti ofaalama ndjoka ota yi ka eta po omwaalu omunene gwoondjuhwa moshilongo shoka ta shi ka shunitha pevi uuwindji wonyama ndjoka Namibia ha landa kiilongo iikwawo, oshowo oku yambula po onkalonawa yiipalutha moshilongo. 

“Moku tekula oondjuhwa dhetu yene otashi shunitha pevi oku kala twi inekela moku landa iikulya pondje yoshilongo, shoo ta shi tu kwathele tu kokeka eliko lyoshilongo,” osho Scheltwein a ti.

– mrndeumaneraycharles@gmail.com