Charles Ndeumane

Omupresidende Nangolo Mbumba okwa gandja elombwelo kuuministeli welongo opo wu se oshisho kutya oosikola dhopaumwene otadhi longo aanona omalaka gomavalelwamo gomoshilongo. 

Mbumba okwa gandja elombwelo ndyoka moku taamba ko eindilo ndyoka kwa ali a tuminwa komuwiliki wehangano lyoAR Movement Job Amupanda.

Momuntumwafo ndjoka a shangele koominista mbali dhelongo – lyopetameko nolyopombanda, Mbumba okwa ti eindilo lyaAmupanda okwe li ndhindilike, nokweli li tumine kuuministeli ngoka wu na kuunganga noshinima shoka. 

Meindilo lye, Amupanda okwa dhenge omuthindo kesimano lyomalaka guuvalelwamo nonkandangala ndjoka haga dhana ngele tashi ya koku kwatela po omithigululwakalo. “Oosikola dhopaumwene ohadhi longo omalaka gaza kondje yoshilongo ngaashi Oshiafrikaans, dho ina dhi hala oku longa omalaka momoshilongo shetu, ka shi li mondjila,” Amupanda ta ti.

Amupanda okwa ti oosikola dhopaumwene odhina elongo li na ongushu sho osho Aanamibia oyendji yiiyemo yopokati haya fala ko uunona wawo, ashike okwe dhi pe uusama sho ihaadhi longo omalaka gomoshilongo. “Epangelo olya ningi epuko sho lya pitike oosikola dhopaumwene dhi longe omalaka giilongo yilwe manga ta dhi ningi omalaka gomoNamibia okatongo,” osho Amupanda a tsikile meindilo lye.

“Aantu kaayeshi onakuziwa yawo oya fa omuti gwaana omidhi, nande owu mone gwa ziza nawa ka guna esiku inaagusa sigo gwa gu po thilu thili. Elaka lyuuvalelwamo olyo limwe lyomomidhi ndhoka tu na oku gamena,” Amupanda a ti.

– mrndeumaneraycharles@gmail.com