Charles Ndeumane

Omapopyo gelanditho lyomina yoDundee kenahangano lyokoChina lyedhina Sinomine Resources Group, oga eta etegelelo ewanawa kaakalimo yomondoolopa yaTsumeb mboka taya ti eliko lyondoolopa otali ka yambuka po, noongeshefa ndhoka dha sa otadhi ka yumuka. 

Engel Nawatiseb ngoka a li mayola gwondoolopa ndjoka okwa ti oongeshefa otadhi pata oshoka kapu na aanashimaliwa yokulanda, aakalimo kaye na iilonga oshoka aagandji yiilonga aanene, iilonga oye yi gandja po kaantu ya za kondje yoTsumeb. Ta ti aantu mboka ngele ya futwa ohaya fala iimaliwa yawo koondoolopa dhawo hoka ya za.

Nawatiseb okwa indile aanangeshefa aape mboka taye ya mondoolopa yaTsumeb, kondandalunde ehangano lyoSinomine Resources Group, lyokugandja po iilonga kaantu ya za koondoolopa dhimwe omanga aakalimo yomoTsumeb kaaye na iilonga. 

“Oongeshefa ohadhi nkondopala uuna aantu yomondoolopa ye na iilonga,” osho Nawatiseb ta ti.

 “Iilonga iiwanawa nehumokomeho ndyoka lya etelwa oshigwana shaTsumeb koDundee otu yi shi noitatu mana okupandula, ashike otatu yi pe ombedhi onene molwaashoka oya kutha aantu yokoondoolopa dhokokule. Ongoshizemo oomiliyona odhindji odha ya kiitopolwa yilwe pehala lyokulongitha iimaliwa mbyoka mondoolopa yaTsumeb moka aakalimo ye li moshiponga kiikwauzigo mbyoka hayi longithwa komina yawo,” osho Nawatiseb a thamuna ngaaka moonkundathana dha li pokati koNamibian Competition Commission noTsumeb Business Consortium.

Mayola gwondoolopa yaTsumeb Mathews Hangula okwa lombele Kundana kutya oshoshili oongeshefa odhindji otadhi pata moTsumeb. Okwa ti omahupilo mondoolopa okwa li ga gumwa unene komukithi gwoCovid-19, niizemo yomukithi ngoka natango onkene tayi shongolitha oongeshefa mondoolopa.

Hangula okwa ti epato lyomina yoTschudi nalyo olya guma nayi omahupilo gondoolopa yaTsumeb shoka sha etitha noongeshefa odhindji dhi pate. “Uuna oongeshefa oonene dhe ya mondoloopa ohadhi yambula po omahupilo oshoka oh dhi eta mo oshimaliwa, ashike uuna tadhi ka pata oshi na iizemo iiwinayi komahupilo mondoolopa,” osho Hangula a tsikile.

OngaNawatiseb, Hangula naye okwa indile aanangeshefa aape mboka taye ya moTsumeb ya gandje tango iilonga kaakalimo. “Ongaashi ashike omapopyo taga ti Aakiina ihaya longitha oombaanga moshilongo, anuwa ohaya yi niimaliwa yawo koshilongo shawo, shika osha faathana naantu mboka haya ka longa koTsumeb nuuna ya kwata oondjambi dhawo ohaye ke dhi longitha koondolopa dhawo hoka ya za,” ta gwedha po.

Maria Shilongo gwongeshefa yo-TK Investment okwa ti mondoolopa kamu na aalandi nande nande, oongeshefa odhindji otadhi pata opo dhi ikaleke kokule noondjo. “Kutya nee ongeshefa yoye otayi ningi iimaliwa nenge itayi ningi iimaliwa, owu na ashike okufuta Bipa naSocial Security, shila ongele to pata ongeshefa yoye opo waa kale wu na oondjo,” osho Shilongo a ti.

Nawatiseb naShilongo ayehe oya popile etulo miilonga lyoshimaliwa shi na okupewa Aanamibia ayehe mboka kaaye na iilonga, taya ti otashi ka yambula omahupilo mondoolopa yaTsumeb. “Kehe ashike okamaliwa hoka epangelo tali vulu okugandja kAanamibia otaka kwathele ashike okuyambula po omahupilo oshowo oongeshefa,” Nawatiseb ta ti.

-mrndeumaneraycharles@gmail.com